राजकीय वरदहस्त व संबंधित अधिकारी खिशात ठेवणा-या कंपनीवर खरंच कारवाई होईल..?
सुरेश मिसाळ : महान्यूज लाईव्ह
इंदापूर : शेटफळ हवेली येथील पाझर तलावातील मुरुमाचे उत्खननासाठी एनपी इन्फ्रा प्रोजेक्टस प्रा.लि. कंपनीने परवानगी घेतली खरी.. पण काही नेत्यांच्या सहकार्याने शासकीय अटी बासनात गुंडाळून परवानगीपेक्षा कितीतरी पटीने मुरुम दिवस रात्र उचलून एक प्रकारे मुरुमावर दरोडा टाकला.
बेकायदेशीर मुरूम उचलणाऱ्या कंपनीवर कारवाईची मागणी करूनही महसूल खाते कंपनीवर फिदा झाले व कारवाई न करता दात काढून गप्प बसले…अखेर गावच्या तंटामुक्ती अध्यक्षांनीच कारवाईसाठी उपोषणाचे हत्यार उपसले.. कारवाई झाल्याशिवाय माघार नाही असे म्हणत इंदापूर तहसील कार्यालयासमोर २० सप्टेंबर पासून उपोषण करणार असल्याचा इशारा त्यांनी दिला.
इंदापूर तालुक्यात राजकीय नेत्याच्या राजाश्रयाच्या आशीर्वादाने तसेच पैशाच्या व महसूलच्या प्रशासनाच्या सहकार्याने निर्धास्तपणे परवानगी पेक्षा लाखो रुपयांचा अधिकचा अधिकचा मुरूम दिवस रात्र उचलणाऱ्या एन.पी.इन्फ्रा कंपनीने तालुक्यात धुडगूस घातला आहे. इंदापूर तालुक्यात या कंपनीचा खूप मोठा बोलबाला सुरू आहे.
प्रजापती नामक परप्रांतीय व्यक्ती बड्या धेंडांचा बाप झाल्यासारखे वागत आहे. मग्रुरी व अधिकाऱ्यांना मॅनेज करण्याचा हातखंडा असल्याने त्याच्या वाटेला जाण्याची हिंमत कोणाचीच होत नाही. अनेकांनी कंपनी विरोधात बोलायची हिम्मत केली, मात्र त्यांची तोंडे एका झटक्यात बंद केली. त्यासाठी काहींना राजकीय पॉवर दाखवली गेली.. तर काहींना आर्थिक अमिष दाखवत शांत केले.
आता शेटफळ हवेली गावातील तंटामुक्ती समिती अध्यक्ष संजय शिंदे यांनी एन.पी.इन्फ्रा कंपनीवर कारवाईची मागणी केली आहे. शेटफळ हवेली येथील पाझर तलावातील मुरुम उत्खनन करण्याची परवानगी एन.पी.इन्फ्रा प्रोजेक्टस् प्रा.लि.यांनी घेतली असून अप्पर जिल्हाधिकारी यांनी घालून दिलेल्या शासकीय अटींचे कंपनीने उल्लंघन केले असून त्यांच्यावर योग्य ती कार्यवाही करण्यात यावी. या मागणीचे निवेदन संजय शिंदे यांनी काही दिवसांपूर्वी इंदापूर तहसील कार्यालयामध्ये दिले होते.
परंतु सदर निवेदनावरती महसूल खात्याकडून अद्याप कोणतीही कारवाई झाली नाही. त्यामुळे शिंदे यांनी २० सप्टेंबर पासून इंदापूर तहसील कार्यालयासमोर आमरण उपोषण करणार असल्याचे स्पष्ट केले होते. इंदापूर तहसील कार्यालयाला संजय शिंदे यांनी निवेदन दिले आहे. त्यामध्ये म्हटले आहे की, शेटफळ हवेली तलावातून ५० हजार ब्रास मुरुम उचलण्यास परवानगी सदर कंपनीने दि. २१/५/२०२४ रोजी घेतली होती. परंतु सदर कंपनीने त्यापेक्षा कितीतरी जास्त पटीने अवैधरित्या मुरूम उत्खनन केलेले आहे. याची चौकशी करून कारवाईची मागणी करण्यात आली आहे.
सदर कंपनीला सकाळी ६ ते सायंकाळी ६ या वेळेतच मुरुम उचलण्यासाठी परवानगी असताना सदर कंपनीने रात्रंदिवस नियमबाह्य मुरूम उत्खनन केल्याचा आरोपही करण्यात आला आहे. संबंधित कार्यान्वीत यंत्रणा व क्षेत्रीय महसूल कर्मचाऱ्याच्या उपस्थितीत सदर जागेची मोजणी करुन सिमांकन केलेल्या क्षेत्रामध्येच कंत्राटदारांनी उत्खनन्न करणे बंधनकारक असताना, सदर कंपनीने शेटफळ तलावामध्ये कोठेही स्वमर्जीने नियमबाह्य मुरूम उत्खनन केलेले आहे.
उत्खनन करून ज्या रस्त्याने वाहतूक केली, त्या रोडचे नुकसान झाले आहे. सदर रोड हा डांबरी असून या रोडवरती पडलेले खड्डे हे डांबर टाकून न बुजवता मुरूम टाकून बुजवलेले आहेत. कंपनीकडून नियमबाह्य पद्धतीने रात्रीच्या वेळी उत्खनन केल्याचे व वाहनातून घेऊन गेल्याचे सर्व व्हिडिओ चित्रीकरण पुरावे आहेत. सदर कंपनीचे मॅनेजर यांनी तालुक्यातील खाजगी वाहने कंपनीच्या नावाखाली चालवून तालुक्यामध्ये खूप मोठ्या प्रमाणामध्ये मुरूम विक्री केली आहे. या मॅनेजर वरती गुन्हा दाखल करून कारवाई करण्यात यावे. अशी ही मागणी करण्यात आली आहे.
गावातील युवकांनी संबंधित तहसिलदारांना या घटनेची फोनवर माहिती दिली. तसेच तलाठी व सर्कल यांनाही या घटनेची फोनवर माहिती दिली व ११२ या आपत्कालीन नंबरवर कॉल करुन इंदापूर पोलिस स्टेशनलाही माहिती दिली होती. परंतु वरील सर्व अधिकाऱ्यांनी कोणतीही कारवाई न करता कंपनीला पाठीशी घालण्याचा प्रयत्न केला जात असल्याचा गंभीर आरोप करण्यात आला आहे.
संबंधित कंपनी व तिच्या कमिशन कमविणा-या मॅनेजर यांचेवर तसेच या कामांमध्ये वापरण्यात आलेली सर्व वाहने जप्त करून कडक कारवाई करण्यात यावी व सदर कंपनीचा परवाना ब्लॅक लिस्ट मध्ये टाकावा व शासकीय बुडविलेला महसूल शासनाने वसूल करावा. असे त्यांनी या निवेदनामध्ये नमूद केलेले आहे.
