विक्रम वरे : महान्यूज लाईव्ह
गुरुवारी मध्यरात्री 11 च्या सुमारास गोळीबार झाला. गोळीबारानंतर फरार झालेला मुख्य आरोपी गौतम काकडे आज पोलिसांनी शिताफीने पकडला. गौतम काकडेला अटक करण्यात आली असून, या प्रकरणात आपर्यंत गौतम काकडे सह गौतम काकडे चा भाऊ गौरव काकडे व वडील शहाजी काकडे या तिघा जणांना पोलिसांनी अटक केलेली आहे.
निंबूत येथील गोळीबारात जखमी झालेल्या फलटणच्या रणजीत निंबाळकरांची जगण्याची लढाई काल पहाटे अडीच वाजता संपली. त्यानंतर रणजीत निंबाळकरांचे चाहते, त्यांचे नातेवाईक व निकटवर्तीय यांनी आज सकाळी वडगाव निंबाळकर पोलीस ठाणे गाठले. याच पोलीस ठाण्यात हा गुन्हा दाखल आहे, मात्र गौतम काकडेला अजून अटक करण्यात आलेली नसल्याने गौतम काकडेला अटक करा, आमचा बैल आमच्या ताब्यात द्या, अन्यथा आम्ही गौतम काकडे च्या घरासमोरून हलणार नाही असा इरादा व्यक्त करत गर्दी वाढू लागल्याने तणाव निर्माण झाला होता.
त्या पार्श्वभूमीवर जिल्हा पोलीस दलाच्या स्थानिक गुन्हे अन्वेषण विभागाची पथके, त्याचबरोबर बारामती पोलिसांची पथके,वडगाव निंबाळकर पोलिसांची पथके गौतम काकडेच्या मागावर होती. गौतम काकडे कोठे आहे. या संदर्भात तपास युद्धपातळीवर सुरू होता. आज रात्री उशिरा गौतम काकडेला ताब्यात घेऊन पोलिसांनी अटक केली.
गुरुवारी मध्यरात्री 11:00 वाजल्यानंतर ते आज पहाटेपर्यंत बारामती तालुक्यात मोठी खळबळजनक घटना घडली. बैल आणि बैलगाडा शर्यतीच्या दुनियेत महत्त्वाचं नाव असलेल्या ट्रिपल महाराष्ट्र हिंदकेसरी गौतम काकडे याच्या घरी बैलाच्या व्यवहारावरून गोळीबार झाला, या गोळीबारात जखमी झालेल्या रणजीत निंबाळकर यांच्यावर पुण्यातील खाजगी रुग्णालयात उपचार सुरू होते. मात्र उपचार दरम्यान त्यांचा पहाटे मृत्यू झाला.
बैलाच्या व्यवहारावरून वाद होऊन गोळीबार होण्याची व त्यात एखाद्याचा जीव जाण्याची ही पहिलीच वेळ असल्याने राज्यभरातील बैलगाडा शर्यत प्रेमीना मोठा धक्का बसला.
बैलगाडा शर्यत रक्तरंजित होण्याची तशी ही पहिलीच गंभीर घटना होती. त्यामुळे राज्यभरात या घटनेची चर्चा झाली. गोळीबाराची घटना घडल्यापासून बैलगाडा शर्यत प्रेमींमध्ये गौतम काकडे याच्याबद्दल संतापाची लाट होती.
गौतम काकडे यांच्या व्यवहाराबद्दल अनेक जण बोलू लागले होते. काल पहाटे रणजीत निंबाळकर यांचा मृत्यू झाल्याची बातमी कळताच या संतापाचा कडेलोट झाला. अनेक जण मिळेल त्या वाहनाने वडगाव निंबाळकर ला पोहोचत होते. त्यांनी वडगाव निंबाळकर ला येऊन आमचा सुंदर बैल आमच्या ताब्यात द्या व गौतम काकडेला अटक करा अशी मागणी केली.
दरम्यान या घटनेत पोलिसांनी पाच जणांविरोधात गुन्हा दाखल केला होता. गौरव काकडे यास अटक केली आहे, तर सोमेश्वर कारखान्याचे माजी अध्यक्ष शहाजी काकडे यांना देखील अटक करण्यात आली आहे. त्यामुळे एकूण गुन्ह्यांमध्ये सहा जणांचा समावेश झाला होता. घटना घडल्यापासून गौतम काकडे हा फरारी होता. मात्र पोलिसांनी आज त्याला अटक केली आहे. आता या घटनेतील सीसीटीव्ही फुटेज तसेच रिव्हॉल्व्हर आणि त्याविषयीची अन्य माहिती पोलीस तपासात निष्पन्न होईल.
गुरुवारी रात्री अकराच्या सुमारास गौतम शहाजी काकडे याच्या घरी निंबूत येथे बैलाच्या पैशाच्या व्यवहारावरून गौतम काकडे याचा भाऊ गौरव याने फलटण येथील सुंदर बैलाचा मालक रणजीत निंबाळकर यांच्यावर गोळी झाडली. गोळी डोक्यात गेल्याने निंबाळकर हे गंभीर जखमी झाले होते. त्यांना सुरुवातीला बारामती येथे व त्यानंतर पुण्यात उपचारासाठी दाखल करण्यात आले होते. उपचारदरम्यान त्यांचा मृत्यू झाला.
या संदर्भात अंकिता रणजीत निंबाळकर (रा. स्वामी विवेकानंद नगर फलटण) यांनी फिर्याद दिली असून या फिर्यादीवरून पोलिसांनी खुनाच्या प्रयत्नाचा गुन्हा दाखल केला होता. त्यामध्ये गौतम शहाजी काकडे, गौरव शहाजी काकडे व तीन अनोळखी व्यक्तींविरोधात हा गुन्हा दाखल करण्यात आला होता, मात्र या घटनेतील जखमी निंबाळकरांचे निधन झाल्याने हा खुनाचा गुन्हा म्हणून रूपांतरीत झाला.
