त्याला दाखवलंय मंत्रिपदाचे गाजर..पुढच्या वेळेस मंत्री होण्याकरिता त्याने कारखान्याची वाट लावली..बाकी सगळ्यांची वाट लावली..तू मंत्री काय आमदार कसा होतो तेच मी बघतो!
शिरूर : महान्यूज लाईव्ह
त्याला दाखवलय मंत्रिपदाचे गाजर… पण त्याने कारखान्याची वाट लावलीय, आता तू मंत्रीच काय, आमदार तरी कसा होतो, तेच मी बघतो असे म्हणत उपमुख्यमंत्री अजित पवार यांनी न्हावरे येथील सभेत आमदार अशोक पवार यांच्यावर कडक शब्दांत टीका केली.
शिरूर लोकसभा निवडणुकीची सध्या रणधुमाळी सुरू असून न्हावरे येथे उपमुख्यमंत्री अजित पवार यांची महायुतीचे उमेदवार शिवाजीराव आढळराव पाटील यांच्या प्रचारार्थ सभेचे आयोजन करण्यात आले होते.यावेळी अजित पवार हे बोलत होते.
यावेळी बोलताना अजित पवार म्हणाले की, कारखाना बंद पाडला म्हणून माझ्यावर पावत्या फाडता. माझ्यावर आरोप केले जातात की, कारखाना मी बंद पाडला. परंतु कारखाना निवडणुकीत विजयासाठी मी प्रयत्न केले होते. सभा घेतल्या होत्या. कारखाना निवडणुकीनंतर अशोक पवार यांनी स्वतः चेअरमन होणे गरजेचे होते किंवा अनुभवी व्यक्तीला चेअरमन करणे गरजेचे होते.
मात्र ते त्यांनी केले नाही. स्वतःच्या मुलाला अनुभव नसताना चेअरमन केले. त्याचे अजून वय नाही. कारखाना गरज नसताना मोठ्या क्षमतेचा केला. कारखान्यावर कर्ज करून ठेवले. या उलट स्वतःचा खासगी कारखाना जोरात सुरू ठेवला. कारखाना अडचणीत असताना वेळोवेळी मदत केली आहे. संचालक मंडळ यांनी कारखाना सुरू करण्यासंदर्भात पाऊले उचलणे गरजेचे आहे. परंतु ते तसे काही करत नाही.
केवळ माझ्या नावाने आरोप करतात. आज घोडगंगा कारखाना बंद पडला आहे. त्यामुळे इथल्या बाजारपेठेवर अवकळा आली आहे. यांना पवार साहेबांनी मंत्रीपदाचे गाजर दाखविले आहे. मंत्रिपदासाठी कारखाना बंद पाडला, अन् मंत्रीच काय मी चॅलेंज देतो. तू आमदार कसा होतो, तेच मी आता बघतो! या अजित पवारने मनावर घेतले ना, तर मी मी म्हणणाऱ्यांना आमदार होऊ दिले नाही. मी पण लोकांना सांगेन, याची खरी औकात काय? अशा शब्दांत अजित पवार यांनी त्यांच्या स्टाईलमध्ये अशोक पवार यांना आव्हान दिले.
यावेळी शिरूर तालुक्यात चासकमान चे पाणी नियमित करण्यासंदर्भात अस्तरीकरण करणे, सब रजिस्टर ऑफिस, तसेच ग्रामीण रुग्णालयात १०० बेड चे रुग्णालय सुरू करण्यासंदर्भात प्रस्ताव असल्याचे भाषणात सांगितले. शिरूर तालुक्यात न्हावरे येथे झालेल्या या सभेची व अजित पवार यांनी केलेल्या या वक्तव्याची सध्या राज्यात जोरदार चर्चा सुरू आहे
