दौलतराव पिसाळ : महान्यूज लाईव्ह
महाबळेश्वर पासून 6 किलोमीटर अंतरावर मेटतळे गावच्या हद्दीत अंबेनळी घाटात टेस्ट ड्राईव्हसाठी निघालेल्या टाटा योध्दा कंपनीच्या तीन मिनी टेम्पोंपैकी एका टेम्पो चालकाचा वाहनावरील ताबा सुटल्याने तो टेम्पो रस्त्याकडेचा सुरक्षा कठडा तोडून तीनशे फुुट दरीत कोसळला . या अपघातात टेम्पोचा चक्काचुर झाला. सुदैवाने टेम्पोचा चालक व एक अभियंता हे बचावले.
अर्थात हे दोघेही जखमी झाले आहेत. आणखी महत्त्वाची बाब म्हणजे या दोघांना वाचविण्यासाठी दरीत उतरलेल्या दोघांसह या अपघातात चैघे जखमी झाले. या अपघाताची माहीती मिळताच तहसिलदार तेजस्विनी पाटील घटनास्थळी भेट दिली व पाहणी केली. अपघातामुळे अंबेनळी घाटातील वाहतुक काही काळ विस्कळीत झाली होती.
या अपघातात टेम्पोचालक देवदत्त वाघ (रा जळगाव सध्या राहणार पुणे), इंजिनियर जितेंद्र खाणे (रा पुणे) हे दोघे जखमी झाले. दुसरीकडे या दोघांना वाचविण्यासाठी दरीत उतरलेले सिताराम शिंगरे व सोमनाथ वागदरे हे दोन स्थानिक युवक देखील जखमी झाले. या सर्वांना महाबळेश्वर येथील ग्रामीण रूग्णालयात उपचारासाठी दाखल करण्यात आले.
पुण्याच्या टाटा मोटर्स मधून हे तीन टेम्पो पुणे ते पोलादपूर या टेस्ट ड्राईव्ह साठी निघाले होते पुण्यातील कात्रज खंडाळा येथील खंबाटकी व वाई येथील पसरणी घाट यशस्वीरित्या पार करून हे टेम्पो महाबळेश्वर मार्गे आंबेनळी घाटातून निघाले होते. या प्रत्येक टेम्पो एक चालक आणि एक अभियंता होते दुपारी बाराच्या दरम्यान या तीन टेम्पो पैकी एक टेम्पो 300 फट खाली दरीत कोसळला
हे पाहिलेल्या लोकांनी घटनास्थळी धाव घेतली दरम्यानच्या काळात काही युवक हे दरीत उतरले.
मेटतळे येथील स्थानिक तरूण जेव्हा दरीत उतरले तेव्हा टेम्पोमधील इंजिनियर हे टेम्पो मधुन उडी मारल्याने दरीत 100 फुट अंतरावर आढळून आले. त्यांना काही युवकांनी वर काढण्याचा प्रयत्न सुरू केला.
काही युवक हे 300 फुट खोल दरीत कोसळलेल्या टेम्पो जवळ पोहचले, त्यावेळी टेम्पोत अडकलेला चालक हा वाचवा वाचवा असा ओरडत होता. काही यवुक हे टेम्पोवर चढले व हात देऊन त्याला टेम्पोमधून बाहेर काढत असताना पुन्हा टेम्पोने दोन पटली मारल्या व आणखी खोल दरीत कोसळला. यावेळी जखमी चालकाला वाचविण्याचा प्रयत्न करीत असलेले दोन युवक यात जखमी झाले.
अपघातात बचाव कायार्साठी मेटतळे येथील वामन शिंगरे, संजय धामणसे, श्रषीकेश शिंगरे, बाळु शिंगरे, गौरव शिंगरे यांच्यासह महाबळेश्वर ट्रेकर्सचे सुनिल भाटीया यांच्या नेतृत्वाखाली अमित कोळी, सुनिल केळगणे, निलेश बावळेकर, अक्षय नाविलकर, अमित झाडे, सुमित कोळी, सुरेश वाशिवले, ओकार नाविलकर, सनी बावळेकर व सह्याद्री ट्रेकर्सचे संजय पारठे यांनी सहभाग घेतला. पोलिस विभागाचे वतीने सहायक पोलिस निरीक्षक रौफ इनामदार, नवनाथ शिंदे, अजित पवार, ठोंबरे आदी पोलिस कमर्चारी देखील या वेळी बचावकार्यात सहभागी झाले होते
