बारामती : महान्यूज लाईव्ह
बारामती लोकसभा मतदारसंघातील भारतीय जनता पक्ष, शिवसेना शिंदे गट तसेच महायुतीतील विविध घटक पक्षांच्या पदाधिकाऱ्यांना भेटून समन्वय साधण्यासाठी राज्याचे उच्च व तंत्र शिक्षण मंत्री चंद्रकांत पाटील आज (रविवारी) बारामतीत येत आहेत. यामध्ये ते समन्वयासाठी पदाधिकाऱ्यांची बैठक घेणार असून महत्त्वाच्या पदाधिकाऱ्यांच्या घरी वैयक्तिकरित्या भेट ही देणार आहेत.
बारामती लोकसभा मतदारसंघातील बारामती ची जागा ही उपमुख्यमंत्री अजित पवार यांच्या राष्ट्रवादी पक्षात सोडण्यात आलेली असल्याने या ठिकाणी महायुतीच्या पदाधिकाऱ्यांचा समन्वय साधण्यासाठी चंद्रकांत पाटील खास बारामतीत येत आहेत. मंत्री चंद्रकांत पाटील हे रविवारी सकाळी दहा वाजता बारामतीतील उपमुख्यमंत्री अजित पवार यांचे निवासस्थानी सहयोग सोसायटीमध्ये भेट देणार आहेत. त्यानंतर शहरातील कवी मोरोपंत नाट्यगृहात आयोजित केलेल्या महायुतीच्या समन्वय बैठकीस उपस्थित राहणार आहेत.
या बैठकीस उपस्थित राहून ते मार्गदर्शन करणार आहेत. तसेच कार्यकर्त्यांशी संवाद साधणार आहेत. यानंतर दुपारी दोन वाजता बारामतीचे माजी नगराध्यक्ष सुनील पोटे यांच्या निवासस्थानी भेट देणार असून त्यानंतर अडीच वाजता भाजपचे जिल्हा नेते अविनाश मोटे यांच्या निवासस्थानी भेट देणार आहेत. त्यानंतर दुपारी तीन वाजता भारतीय जनता पक्षाचे नेते बाळासाहेब गावडे यांच्या निवासस्थानी भेट देणार असून त्यांच्याशी चर्चा करणार आहेत.
दुपारी साडेतीन वाजता शिवसेनेचे नेते सुरेंद्र देवरे यांच्या निवासस्थानी ते भेट देणार असून त्यानंतर पंचशील नगर येथील संजय वाघमारे यांच्या निवासस्थानी भेट देऊन त्यांच्याशी चर्चा करणार आहेत. या भेटीदरम्यान चंद्रकांत पाटील हे माळेगाव कारखान्याचे माजी अध्यक्ष रंजन तावरे यांच्या माळेगाव येथील निवासस्थानी भेट देणार असून तेथून ते पुण्याकडे प्रयाण करणार आहेत.
