अखेर दौंड शहरातील मुख्य रस्त्यांनी आणि चौकांनी घेतला मोकळा श्वास! कार्यभार स्वीकारतच पोलीस निरीक्षक चंद्रशेखर यादव यांची अतिक्रमणावार हातोडा!
राजेंद्र झेंडे, महान्युज लाईव्ह
दौंड : ऐका ना खंडेराव…! खंडेराव त्याचं काय असतं माहित्येय का? एखाद्या पोलीस अधिकाऱ्याचं त्याच्या पोलीस ठाण्याच्या हद्दीत काही चांगली काम केली की, कौतुक होतं, पण अशावेळी लगेच त्याला शत्रूही तयार होतात. कारणही तसंच असतं.. संबंधित अधिकारी झाकी मारायला आणि आल्या आल्या लोकांमध्ये आपली इमेज तयार करायसाठी अशा प्रकारची नौटंकी करतो.. अन् असं दाखवतो की, आपण मोठे समाज भक्त आहोत. मग त्याच्या पेपरामध्ये बातम्या झळकल्या की, संबंधित पोलीस अधिकारी हा एक तर सिंघम आहे किंवा काही दिवसानंतर त्याच्या हद्दीत हप्ते वाढले की मग तो मीडिया ओरिएंटेड असल्याचं समजलं जातं.
किंबहुना त्याला फार माध्यमाची हौस आहे, त्यामुळे तो आपल्या सकारात्मक बातम्या पेरतो. अशा प्रकारची चर्चा त्यांचेच इतर सहकारी तयार करतात. पण सगळीकडेच असं नसतं.. आणि खंडेराव सगळेच अधिकारी अशा फक्त झगमगटाला आणि पैशाला हपापलेले नसतात बरं का.. काहीजण खरोखरच लोकांची सेवा करण्याचे ब्रीद घेऊन वावरत असतात, कळलं का?
म्हणजे खंडेराव, त्याचं काय झालं; दौंड शहरातील गर्दीने गजबजलेल्या रस्ते आणि चौकाचौकात कित्येक वर्षांपासून अस्ताव्यस्त अवस्थेत असलेल्या अतिक्रमणावर अचानक हातोडा पडला. मग सगळीकडे चर्चा सुरू झाली.. नवा साहेब रुजू झालाय, नव्याचे नऊ दिवस वगैरे..! पण या पोलीस अधिकाऱ्याला जे जे ओळखतात, त्यांना पक्क माहिती की, हा पोलीस अधिकारी प्रत्येक काम समाजाभिमुख करतो. सिंघम – बिंघम असं काही आम्ही म्हणणार नाही.. बरं का? हा साहेब साधासुधा आहे.. सगळ्या लोकांत मिसळतो.. नाव मात्र दमदार आहे… नाव आहे पोलीस इन्स्पेक्टर चंद्रशेखर यादव!
खंडेराव.. कालची गोष्ट तुम्हाला सांगतो, दौंड पोलीस ठाण्याचा पदभार स्वीकारताच चंद्रशेखर यादव यांनी करवाईला सुरवात केली. दौंड पोलीस ठाण्याचा चार्ज घेतला आणि इथे सगळ्यात मोठी अडचणीची गोष्ट कोणती आहे? तर ती वर्दळीची आणि वाहतुकीची! अतिक्रमणामुळे आणि अरुंद रस्त्यामुळे वाहतूक बोजड बनते. गर्दी वाढते. दुकानदारांवरही त्यांच्या ताण येतो आणि गर्दीवरही!
मग जिथे जातील तिथे पहिला अतिक्रमणावर पहिली नजर टाकत, लोकांना विचारात घेऊन, विश्वासात घेऊन आणि लोकांमध्ये विश्वास निर्माण करत योग्य तो समन्वय साधण्याची भूमिका ठेवणाऱ्या चंद्रशेखर यादव यांनी दौंड मध्येही ते पाऊल उचलले नसते तरच नवल! त्यामुळे त्यांनी शहरात येताच वाहतूकीला आणि ये- जा करण्यास अडथळा ठरणाऱ्या अतिक्रमणे काढल्याने नागरीकांनी समाधान व्यक्त केले.
खंडेराव.. मी काय म्हणतो..या चंद्रशेखर यादवांची कारकीर्द इंदापूर तालुक्यातल्या भिगवणमध्ये असेल, वालचंदनगर येथे असेल, बारामतीच्या गुन्हेशोध पथकामध्ये असेल, नगर जिल्ह्याच्या कर्जत तालुका आणि कोतवाली शहर पोलीस ठाण्यामध्ये असेल आणि अगदी सिन्नरच्या पोलीस ठाण्यात अल्पकालावधीतील सेवा असेल, चंद्रशेखर यादव जिथे जातील, तिथे पहिल्यांदा लोकांचा मार्ग मोकळा करतात.. मग तो रस्ता असेल किंवा खाजगी सावकारी! किंवा गावात दारू पिऊन धिंगाणा घालणारे टुकार असतील किंवा लोकांना त्रास देणारी सडकसख्याहारांची टोळी! एरवी दिसायला नरम असणारा माणूस.. कायद्याच्या राज्यात तेवढाच कठोर आहे, हे फक्त पोलीस ठाण्यात पायरी चढणाऱ्या गुन्हेगारालाच कळते.. इतरांना नाही… कळलं का?
दौंड पोलीस ठाण्याचे पोलीस निरीक्षक भाऊसाहेब पाटील यांची बदली झाल्याने त्यांच्या जागी पोलीस निरीक्षक चंद्रशेखर यादव यांनी पदभार स्वीकारला आहे. पदभार स्विकारला आणि त्यांनी त्यांच्या स्टाईलने पोलीसगिरीला सुरवात केली. शहरातील मुख्य रस्त्यांवर आणि चौका चौकात ठिकठिकाणी बेकायदा अतिक्रमणे केली होती. ही अतिक्रमणे काढण्यासाठी दौंड नगरपालिका प्रशासन पुढे येत नसल्याने नागरिकांना येजा करण्यास मोठा अडथळा ठरत होता.
शहरातील संविधान चौक, शिवाजी चौक, गांधी चौक, डॉ. बाबासाहेब आंबेडकर चौक या मार्गावरील रस्त्यालगत तसेच फुटपाथवर असणाऱ्या छोट-मोठ्या विक्रेत्यांनी वर्षानुवर्षे अतिक्रमण करून शहराचा श्वास कोंडला होता. त्यामुळे वारंवार मोठ्या प्रमाणावर वाहतुक कोंडी होऊन याचा सर्वसामान्य नागरिक व वाहनचालकांना विनाकारण त्रास सहन करावा लागत होता. गेली अनेक वर्षांपासून बेशिस्त वाहतुक, अवैध प्रकारे करण्यात आलेली अतिक्रमणे यामुळे शहराच्या सौंदर्याला बाधा निर्माण तर होतोच , शिवाय याचा फटका सर्वानाच बसतो.
मात्र पोलीस निरीक्षक यादव यांनी हा उपक्रम हाती घेत स्वतः रस्त्यावर उतरून अतिक्रमणांवर हातोडा घातला.
पोलीस अधीक्षक पंकज देशमुख, बारामती विभागाचे अतिरिक्त पोलीस अधीक्षक संजय जाधव, दौंड उपविभागीय पोलीस अधिकारी स्वप्निल जाधव यांच्या मार्गदर्शनाखाली पोलीस निरीक्षक चंद्रशेखर यादव सहायक फौजदार सुरेश चौंधरी, सहायक फौजदार बबन जाधव, पोलीस हवालदार पांडुरंग थोरात, पोलीस शिपाई रवी काळे, योगेश पाटील, योगेश गोलांडे तसेच दौंड नगरपालिकेचे प्रकाश चलवादी, किशोर लांडगे, रणजीत भोसले, कैलास चलवादी, पंकज काळे आदींनी रस्त्यावरील अतिक्रमणे काढून कारवाई केली.
