सागर यादव, भवानीनगर
इंदापूर तालुक्यातील सणसर येथे संत तुकाराम महाराज राष्ट्रीय महामार्गाच्या बायपासवर पाठीमागून आलेल्या अज्ञात वाहनाने दुचाकीस्वार व त्यांच्या कुटुंबीयांना जोराची धडक दिली. या धडकेत सणसर येथील माध्यमिक शिक्षकाचा जागीच मृत्यू झाला. दरम्यान घटना घडल्यानंतर संबंधित वाहन बेदरकारपणे पुढे गेले अशी माहिती प्रत्यक्षदर्शींकडून मिळत आहे.
आज संध्याकाळी साडेसहाच्या दरम्यान हा अपघात झाला सणसर येथील छत्रपती हायस्कूलमध्ये कार्यरत असलेले बलभीम काळे हे त्यांची पत्नी व मुली सह दुचाकीवरून भवानीनगर वरून सणसरकडे निघाले होते. साई पॅलेससमोर ते पोचले असता, पाठीमागून आलेल्या अज्ञात वाहनाने त्यांना पाठीमागून जोराची धडक दिली.
या धडकेत गंभीर जखमी होऊन बलभीम काळे यांचा जागीच मृत्यू झाला. त्यांच्या पत्नी व त्यांची मुलगी देखील जखमी झाले. दरम्यान अपघात घडताच संबंधित वाहन बेदरकारपणे तसेच पुढे निघून गेले. काही जणांच्या सांगण्यानुसार हे वाहन हायवा डंपर होते अशी माहिती मिळत असून, घटनेनंतर काळे यांना तातडीने छत्रपती कारखान्याच्या रुग्णवाहिकेतून उपचारासाठी हलवण्यात आले होते.
