दौंड : महान्यूज लाईव्ह
दौंड रेल्वे जंक्शन स्थानक (बंगला साईड) टिकीट कार्यालयाच्या परिसरात ब्रिटीशकालीन ‘स्टीम इंजिन’ कायमस्वरूपी प्रदर्शनास ठेवावे, तसेच याठिकाणी रेल्वेचे सुसज्य असे म्युझियम (संग्रहालय) उभारण्यात यावे, अशी मागणी दौंड तालुका श्रमिक पत्रकार संघाने राज्य रेल्वेमंत्री रावसाहेब दानवे पाटील यांच्याकडे निवेदनाद्वारे केली आहे.
राज्य रेल्वेमंत्री रावसाहेब दानवे पाटील यांनी रविवारी (दि ७) दौंड रेल्वे जंक्शन ला भेट दिली. यावेळी त्यांनी रेल्वे प्रवासी यांच्याशी विविध समस्या बाबत चर्चा केली. याप्रसंगी दौंड तालुका श्रमिक पत्रकार संघाचे अध्यक्ष अमरसिंह परदेशी, सचिव अजय कांबळे, खजिनदार अख्तर काझी, संघाचे मार्गदर्शक प्रफुल्ल भंडारी,उमेश कुलकर्णी तसेच इतर पदाधिकाऱ्यांनी रेल्वेमंत्री दानवे यांच्याशी विविध विषयावर चर्चा केली.
दौंड रेल्वे स्टेशन हे एक मोठे रेल्वे जंक्शन असून विशेषतः भारताच्या चारही दिशांना जाणे येणे करण्याचे मध्यवर्ती ठिकाण आहे व रेल्वेच्या नकाशावर दौंडचा उल्लेख आहे. देशभरातील हजारो प्रवाशांची या स्थानकात मोठी गर्दी होत असते. दौंड शहरात रेल्वे अधिकारी व कर्मचारी याबरोबर सेवानिवृत्ती कर्मचारी, नागरीक ब्रिटीश काळापासून शहराच्या विविध भागात वास्तव्यास आहे.
सेवानिवृत्त कर्मचारी अधिकाऱ्यांनी ब्रिटीशकालीन स्टीम इंजिनेचे चालक, सहचालक, देखभाल, दुरुस्ती अशा अनेक पदावर कामे केली आहे. ब्रिटीश काळापासून येथील नागरीकांचे रेल्वेशी अतूट असे नाते आहे. दौंड रेल्वे स्थानकात कोळश्याच्या माध्यमातून पाण्याच्या वाफेवर धावणारे (सी.डब्ल्यु.डी) (एच-४) (डी-४) (डब्ल्यु.पी) (डब्ल्यु.जी) अशा निरनिराळ्या प्रकाराचे स्टीम इंजिन रेल्वेस्थानकात उपलब्ध होते.
दौंडहून पुणे, अहमदनगर, सोलापूर, यासह इतर ठिकाणी जाण्यासाठी स्टीम इंजिनचा उपयोग होत होता. एका स्टीम इंजिनसाठी सुमारे १३ रेल्वे कर्मचारी काम करत होते. पुणे, सोलापूर, अहमदनगर, बारामती, या रेल्वेस्थानका बाहेर अशा प्रकारचे स्टीम इंजिन प्रदर्शनास ठेवले आहे. दौंडमध्ये रेल्वेची विनावापराची जागा मोठ्या प्रमाणात आहे. या जागेत ब्रिटीशकालीन रेल्वे ‘स्टीम इंजिनसह’ रेल्वेची जुने, यंत्र, वस्तू आणि त्याची संपूर्ण माहिती असलेले सुसज्य ‘म्युझियम’ अशा ऐतिहासिक वास्तू दौंडला असणे आवश्यक आहे. या माध्यमातून दौंड रेल्वे स्थानक पर्याटनस्थळ म्हणून ओळखले जाईल. या संदर्भात पत्रकार संघाने निवेदन त्यांना ही मागणी केली.
