दौंड : महान्यूज लाईव्ह
दौंड तालुक्यातील खुटबाव येथील अंबिका मसाला केंद्राच्या अध्यक्षा आणि झोपडपट्टीतून छोटासा मसाला उद्योग सुरू करून तो सातासमुद्रापार नेणाऱ्या कमलाताई परदेशी यांचे आज मंगळवारी (दि. २) निधन झाले. पुणे येथील ससून रुग्णालयात त्यांनी अखेरचा श्वास घेतला.
दरम्यान, त्यांच्या निधनाने अनेक गोरगरीब महिलांना छोटे-मोठे उद्योग निर्माण करून स्वतःच्या पायावर उभा करणाऱ्या मायेचा आधार हरपल्याने खुटबाव सह दौंड तालुक्यावर शोककळा पसरली. झोपडपट्टीतून मसाला पदार्थ तयार करून महिला बचत गटाच्या माध्यमातून अंबिका मसाले केंद्र उभारून त्याला मसाला उद्योगापर्यंत नेणाऱ्या कमलताई परदेशी यांनी ६३ व्या वर्षी अखेरचा श्वास घेतला.
रक्ताच्या कॅन्सरमुळे त्या मागील काही महिन्यापासून त्रस्त होत्या. मागील एक महिन्याभरापासून त्यांच्यावर पुणे येथील ससून रुग्णालयात उपचार सुरू होते. उपचारादरम्यान त्यांचे आज मंगळवारी निधन झाल्याचे रुग्णालयाच्या वैद्यकीय अधिकाऱ्यांनी जाहीर केले. त्यांच्या निधनांची बातमी दौंड तालुक्यात वाऱ्यासारखी पसरली असून त्यांच्या निधनाने अनेकांना अश्रू अनावर झाले.
कमल परदेशी यांनी सन २००० साली खुरपणीच्या काम करुन त्यातून मिळणाऱ्या पैशांची बचत करत ग्रामीण भागातील महिलांना मसाले बनविण्यासाठी बचत गटाच्या माध्यमातून अंबिका महिला औद्योगिक सहकारी संस्थेची स्थापना केली होती. आज अंबिका मसाल्यांना देशभरातच नाही, तर परदेशातही मोठी मागणी आहे. त्यांचे मसाले पदार्थ सातासमुद्रापार गेले आहेत.
कमल परदेशी यांचा शेतमजूर ते मसाला उद्योजिका हा प्रवास अत्यंत कष्टाचा, हालअपेष्टा सोसून त्यांनी मसाला उद्योग वाढवला होता. दौंड तालुक्यातील अनेक गोरगरीब महिलांना त्यांनी उद्योग निर्माण करून व्यवसायाची रोजी रोटी दिली होती. महिलांना उद्योग धंद्याच्या माध्यमातून आर्थिक सक्षम करण्याचं त्यांचे ध्येय शेवटच्या श्वासापर्यंत सुरू होते.
त्यांना त्यांच्या या कार्याबद्दल विविध संस्थांनी, सामाजिक संघटनांनी विविध पुरस्कार देऊन सन्मानित केले होते. त्यांनी आयुष्यभर कष्ट आणि त्याग करीत जिद्दीचा जोरावर झोपडी ते मोठी उद्योजिका ही गरुडझेप आता काळाच्या पडद्याआड गेल्याने दौंड तालुक्यातील विविध सामाजिक संस्था, संघटना आणि विविध क्षेत्रातील अनेकांनी शोक व्यक्त केला आहे.
