नगर : महान्यूज लाईव्ह
नगर शहरातील माणिक नगर या उच्चभ्रू वसाहतीत डॉक्टर ऋषभ फिरोदिया यांच्या घरात अचानक चोरी झाली. अत्यंत उच्चभ्रू असलेल्या ठिकाणी झालेल्या चोरीमुळे परिसरात खळबळ उडाली आणि या चोरीत जो ऐवज गेला होता, त्यामुळे तर याची चर्चा जास्त झाली; कारण तब्बल 33 लाख रुपयांचे हिऱ्यांचे 550 ग्रॅम चे सोन्याचे दागिने चोरीला गेले होते.
अर्थात तांत्रिक विश्लेषणाची जोड पोलीस तपासाला अलीकडच्या काळात मिळाली असली, तरीही जुन्या काळातील पोलिसांची तपासाचे जे मानसिक कौशल्य आहे, त्या कौशल्याच्या आधारे पोलिसांनी केलेला तपास अत्यंत महत्त्वपूर्ण ठरला आणि या घटनेतील मुख्य आरोपी पोलिसांच्या ताब्यात आला.
या तपासात ज्या पद्धतीने पोलिसांनी कच्चे दुवे व धागेद्वारे शोधले, त्यामुळे प्रभावित होऊन पोलीस अधीक्षक राकेश ओला यांनी चक्क कोतवाली पोलिसांना 35 हजार रुपयांचे बक्षीस जाहीर केले.
पोलिसांनी सफाईदारपणे उघडकीस आणलेल्या या चोरीतील 33 लाखांचे हिऱ्यांचे 55 तोळ्याचे दागिने पोलिसांनी हस्तगत केले आहेत. या गुन्ह्यात राहुरीतील दीपक सर्जेराव पवार (वय 32, रा. मल्हारवाडी रोड, राहुरी) याला अटक केल्याची माहिती पोलीस अधीक्षक राकेश ओला, अपर पोलीस अधीक्षक प्रशांत खैरे आणि कोतवाली पोलीस ठाण्याचे निरीक्षक चंद्रशेखर यादव यांनी पत्रकार परिषदेत दिली.
यातील मिळालेली माहिती अशी की डाॅ. ऋषभ फिरोदिया यांच्या घरी एक वेळ नाही तर दोन वेळा चोरी झाली होती. 23 आणि 28 आॅक्टोबरच्या दरम्यान झालेल्या या चोरीत फिरोदिया यांच्या घराच्या कपाटातील 55 तोळे सोन्याचे दागिने, हिरे, पुष्कराज, मोती आणि पाचू असे चोरीला गेले होते. याशिवाय एक घड्याळ आणि 17 हजार रुपयांचा रोख रक्कम, असा मोठा मुद्देमाल चोराने चोरून नेला होता.
डाॅ. ऋषभ फिरोदिया यांनी कोतवाली पोलीस ठाण्यात तक्रार दिली. कोतवालीचे पोलीस निरीक्षक चंद्रशेखर यादव यांनी सहकाऱ्यांसह चोरीच्या घटनास्थळी 4 ते 5 वेळा तपासणी केली. चोरांनी सफाईदारपणे चोरी केली होती. त्यामुळे तपासाचे आव्हान होते. तपास सुरू झाला, पण सुरूवातीला धागेदोरे हाती लागत नव्हते. परंतु तपासात पोलीस निरीक्षक चंद्रशेखर यादव सहकाऱ्यांसह सातत्य ठेवले. सीसीटीव्हीची तपासणी मोठ्या प्रमाणावर सुरू केली.
तब्बल सत्तर ठिकाणच्या दीडशे सीसीटीव्ही फुटेज तपासणी पोलिसांनी केली. एका ठिकाणी फक्त तीन सेकंदामध्ये असलेल्या फुटेज मधून आरोपीचा सुगावा लागला, मात्र दुसरीकडे चोरीची पद्धत आणि तपासातील मानसिक कौशल्य याच्या आधारे झालेल्या तपासात महत्त्वपूर्ण धागेदोरे सापडले.
पोलीस अधीक्षक राकेश ओला यांचे मार्गदर्शन घेत पोलीस निरीक्षक चंद्रशेखर यादव यांनी पथकाला तपासाच्या पुढच्या सूचना केल्या. यानंतर पथकाने तपासात वेग घेतला आणि राहुरीतील दीपक पवार भोवती सापळा आवळला. दीपक पवार याला राहुरी बसस्थानक परिसरातून कोतवाली पोलिसांनी ताब्यात घेतले. दीपक पवार सुरूवातीला काहीच सांगत नव्हता. दिशाभूल करत होता. अधिक विश्वासात घेऊन विचारपूस केली असता चोरी केलेले बरेच सोने हे घरी असून काही सोने सेलू परभणी येथील 2 सराफाला विकाल्याचे त्याने कोतवाली पोलिसांना सांगितले.
कोतवाली पोलिसांनी परभणी येथील सराफाकडून आणि दीपक याच्या घरातून सोन्याचे 550 ग्रॅम दागिने जप्त केले. दीपक पवार याला न्यायालयासमोर हजर केल्यावर त्याला तीन दिवसांची पोलीस कोठडी सुनावली.
नगर जिल्हा पोलीस अधीक्षक राकेश ओला, अपर पोलीस अधीक्षक प्रशांत खैरे, उपविभागीय पोलीस अधिकारी अनिल कातकाडे यांचे मार्गदर्शनाखाली पोलीस निरीक्षक चंद्रशेखर यादव, उपनिरीक्षक गजेंद्र इंगळे, अश्विनी मोरे, पोलीस जवान तन्वीर शेख, गणेश धोत्रे, योगेश भिंगारदिवे, संदीप पितळे, ए. पी. इनामदार, सलीम शेख, अभय कदम, शाहीद शेख, अमोल गाडे, संदीप थोरात, सुजय हिवाळे, कैलास शिरसाठ, सोमनाथ राऊत, अतुल काजळे, लोणी पोलीस स्टेशनचे रविंद्र मेढे, दक्षिण मोबाइल सेल चे राहुल गुंड हे पथक तपासात सहभागी झाले होते.
