राजेंद्र झेंडे, महान्यूज लाईव्ह
दौंड : दौंड तालुक्यातील दहा ग्रामपंचायतीच्या निवडणुकीसाठी ५० मतदान केंद्रावर रविवारी किरकोळ वाद वगळता शांततेत मतदान प्रक्रिया पार पडली. या ग्रामपंचायतीच्या निवडणुकीसाठी एकुण ७८.४० टक्के मतदान झाले. दौंड तालुक्यात अकरा ग्रामपंचायत साठी निवडणूक प्रक्रिया मागील काही दिवसांपासून सुरू होती.
अकरा ग्रामपंचायतींपैकी वाटलूज ग्रामपंचायत ही सरपंच पदासह सर्व जागा बिनविरोध निवड करण्यात आली. त्यामुळे उर्वरित केडगाव, पारगाव, खोपोडी, नायगाव, मलठण, पांढरेवाडी, वाखारी , कुरकुंभ, पानवली, वडगाव बांडे या दहा ग्रामपंचायतीची मतदान प्रक्रिया रविवारी (दि.५) शांततेत पार पडली. या ग्रामपंचायत निवडणुकीत सरपंच पद हे थेट जनतेतून असल्याने सरपंच पदाच्या निवडणुकीसाठी मोठी चुरस पहायला मिळाली.
तालुक्यातील केडगाव ,पारगाव व मलठण या ग्रामपंचायत सरपंच पद हे सर्वसाधारणसाठी (खुले ) प्रवर्गासाठी आहे. केडगाव आणि मलठण या ठिकाणी महिला उमेदवार सरपंच पदाच्या रिंगणात उभ्या आहेत. त्यामुळे या ठिकाणी ओबीसी उमेदवारांनीही सर्वसाधारण जागेतून उमेदवारी अर्ज भरल्याने या ठिकाणी मराठा व ओबीसी असा वाद निर्माण होण्याची शक्यता असून मतदान करण्यासाठी जातीचा आधार घेत असल्याची चर्चा मतदान केंद्राच्या बाहेर पहायला मिळाली.
दरम्यान केडगाव ७२.०८ टक्के ,पारगाव ८०.७३ टक्के,खोपोडी ९२.६८ टक्के, नायगाव ७८.९९ टक्के, मलठण ७६.९३ टक्के,पांढरेवाडी ८५.८१ टक्के, वाखारी ७१.८१ टक्के , कुरकुंभ ७९.३१ टक्के, पानवली ९४.१७ टक्के, वडगाव बांडे ९०.१७ टक्के या दहा ग्रामपंचायतीसाठी एकुण ७८.४० टक्के मतदान झाले. सगळ्यात जास्त मतदान पानवली ग्रामपंचायत साठी ९४.९७ टक्के तर सर्वात कमी वाखारी ७१.८१ टक्के झाले.
केडगाव आणि मलठण या मतदान केंद्रावर सायंकाळी सव्वा सात वाजेपर्यंत मतदारांची रांग लागल्याने मतदान प्रक्रिया सुरू होती. ही मतदान प्रक्रिया पार पडलेल्या ग्रामपंचायती निवडणुकीची मतमोजणी प्रक्रिया सोमवारी ( दि ६) दौंड नवीन प्रशासकीय इमारत ( तहसीलदार कार्याल) सकाळी ९.३० वाजता सुरू होणार आहे. ही माहिती दौंड तालुका निवडणूक निर्णय अधिकारी तथा दौंड तहसीलदार अरुण शेलार व निवासी नायब तहसीलदार ममता भंडारे- देशमुख यांनी दिली.
