जेव्हा कोविड केअर सेंटरमधून फॅबीफ्ल्यू चोरीला जातात…!

सुरेश मिसाळ : महान्यूज लाईव्ह

इंदापूर : कोरोनाच्या काळातही औषध कंपन्यांनी गोरखधंदा केला. रेमीडीसीव्हर व टोसीमुझोलॅब सारख्या औषधांच्या किंमतींनी गगनालाही ठेंगणे केले. टोसीमुझोलॅब इंजेक्शन तर काळ्या बाजारात ७५ हजारांपर्यंत विकले गेले. गरजवंतांना अक्कल नसते म्हणतात, पण कधी खावे, किती खावे याची तरी अक्कल सुशिक्षितांना दिलेली असेलच ना?…खासगी औषध विक्रेत्यांचे सोडा, निमगावच्या कोविड सेंटरमध्ये तर फॅबीफ्ल्यूचे दोन बॉक्सच डॉक्टरने कोणतीही नोंद न करता नेले आणि एकाच कुटुंबाला दिल्याचे निर्लज्जपणे सांगितले. ९ सप्टेंबरला घडलेल्या या घटनेची कोणीच वाच्यता केलेली नाही, मात्र अशा डॉक्टरवर कोणतीच कारवाई झालेली नाही, होणार नाही! मग सामान्यांना मास्कसाठी पोलिस का पकडतात?

निमगाव केतकीच्या कोविड केअर सेंटरमधील कोरोनाग्रस्तांसाठी आलेल्या फॅबीफ्ल्यू या गोळ्यांचे दोन बॉक्स परस्पर घेऊन जाण्याची घटना घडली. ही सरकारी चोरीच म्हणावी लागेल. मात्र या घटनेने सामान्यांचे कोणालाच देणेघेणे नाही, सरकारी डॉक्टरांमध्ये अनास्था आहे हेच दिसून आले आहे. डॉक्टर जर गोळ्या चोरून आपल्या दवाखान्यात वापरत असतील, तर इतर सरकारी साधनेही वापरत नसतील कशावरून?

सरकारी औषधे खासगी दवाखान्यात न्यायची ही कदाचित नेहमीची परंपरा असावी, मात्र फॅबीफ्ल्यू ला सध्या कोरोनाच्या काळात खूपच भाव आला आहे. या फॅबी फ्ल्यूच्या एका पाकिटाची औषध दुकानातील कमाल किंमत २ हजार ते ३ हजार रुपये आहे. त्यामुळे जेव्हा ८ पाकिटे म्हणजे पंचवीस ते तीस हजारांचा खेळ आहे अशी बाब समोर आली, तेव्हा चोरीचे भांडे फुटले.

09 सप्टेंबर रोजी ही घटना घडली. याची माहिती अशी की, निमगांव केतकीच्या ग्रामिण रूग्णालयात कोवीड केअर कक्षात दाखल असलेल्या रुग्णांसाठी फॅबी फ्ल्यू च्या ५१० गोळ्यांचा साठा शिल्लक होता. एका पट्टीत या ३४ गोळ्या असतात व त्याची बाजारातील किंमत कंपनीनुसार २ हजार ते ३ हजार रुपयांपर्यंत असते, ९ सप्टेंबर रोजी या रुग्णालयाच्या औषध भांडार विभागात ५१० गोळ्या शिल्लक होत्या. मात्र संध्याकाळी त्या शिल्लक नसल्याचे आढळून आले. संध्याकाळी एका रूग्णाला गोळ्या देण्याची वेळ आली, तेव्हा शोधाशोध सुरू झाली आणि त्यातून बाहेर आली, सरकारी अनास्थेची एक किळसवाणी कहाणी!

एका दिवसात १० पाकिटे लंपास झाल्याचे दिसल्यानंतर याची चर्चा सुरू झाली आणि त्या चर्चेदरम्यान ९ सप्टेंबर रोजी सकाळी एक डॉक्टर या गोळ्यांची विचारणा करीत होते अशी माहिती आल्यानंतर एका कर्मचाऱ्याने संबंधित डॉक्टरकडे विचारणा केली, तेव्हा त्या डॉक्टरने अगोदर दोन स्ट्रीप आणल्या आहेत, नंतर दोन बॉक्स आणले आहेत अशी कबुली दिली आणि या साऱ्या स्ट्रीप माझ्या दवाखान्यात येणाऱ्या रुग्णांना दिल्या आहेत असे स्पष्टीकरण दिले. त्यानंतर सारी गुंतागुंत वाढली. ज्यांच्यावर जबाबदारी होती, तेही सारे हादरले. चर्चा वाढताच संबंधित डॉक्टरने देखील एका कुटुंबाला दिलेल्या दोन पट्ट्या वगळून इतर आठ पाकिट्यांचे दोन बॉक्स दवाखान्यात परत केल्याचे समजते. ते देखील अजून अधिकृत नाही. वरिष्ठ अधिकाऱ्यांनी तशी माहिती दिली आहे, म्हणून त्यावर विश्वास ठेवायचा!

मात्र कोरोनासारखे महाभयंकर संकट आहे, याच निमगावच्या कोविड केअर सेंटरमधून रुग्ण दगावताहेत, असे असूनही केवळ आपण जे काम करतो आहेत, त्याकडे पाहून लोक काही बोलत नाहीत याची काहीही जाणीव न ठेवता सरकारी माल आपल्या मालकीचा करण्याची ही पध्दत जी सुरू आहे, ती खरोखरच किळस आणणारी आहे.

यासंदर्भात या रुग्णालयाचे वैद्यकीय अधिक्षक डॉ. मिलींद खाडे यांच्याकडे विचारणा केल्यानंतर संबंधित डॉक्टरांनी गोळ्या परत केल्या आहेत, त्यांनी देखील कोरोनाग्रस्तांनाच देण्यासाठी त्याचा वापर केला आहे अशी स्पष्टोक्ती केली.

मात्र सरकारी नियमानुसार दवाखान्यात उपचारासाठी दाखल रुग्णाला त्या गोळ्या द्यायच्या आहेत, गरीब व गरजू रुग्णच सरकारी सेवेचा लाभ अधिक प्रमाणात घेत आहेत, कारण त्यांच्याकडे खासगी उपचारासाठी पैसे नाहीत, अशाच रुग्णांसाठी या गोळ्या वापरण्याची आवश्यकता होती. त्या तत्वाला मात्र जर डॉक्टरच हरताळ फासत असतील, तर सरकारी अनास्था चोरीच्याही पलीकडे गेली आहे असेच म्हणावे लागेल.