नगर : महान्यूज लाईव्ह
तब्बल 12 गुन्हे दाखल असलेले आणि हडपसर पोलीस ठाण्याच्या अनेक गुन्ह्यात मोका लागलेले आरोपी नगर जिल्ह्यात फिरत होते. या गुन्हेगारांनी सराफा बाजारातील वर्मा ज्वेलर्सचे दुकान फोडले. सोन्याचे दागिने आणि रोख रक्कम असा २४ लाखांचा ऐवज या गुन्हेगारांनी चोरला, मात्र नगरच्या कोतवाली पोलिसांनी अत्यंत शिताफीने तपास करत या टोळीतील दोघे नाशिकमधून जेरबंद केले.
नगर शहरातील मध्यभागी असलेल्या सराफा बाजारातील वर्मा ज्वेलर्स हे दुकान फोडून सोन्याचे दागिने व रोख रक्कम असा सुमारे २४ लाखांचा ऐवज लुटणाऱ्या टोळीला जेरबंद करण्यासाठी कोतवाली पोलिसांची तीन पथके गुन्हा घडल्यापासून सलग आठ दिवस आरोपींच्या मागावर होती.
टोळीतील दोन आरोपी रेल्वेने प्रवास करून पळून जाण्याच्या तयारीत असताना धावत्या ट्रेनमध्ये आरोपींचा शोध घेऊन कोतवाली पोलिसांनी आरोपींना नाशिक मधून अटक केली. अक्षयसिंग बिरूसिंग जुनी (वय २२ वर्षे, रा. वैदवाडी, गोसावी वस्ती, हडपसर), अनमोल चरणसिंग शिकलकर (वय 23 वर्षे, राहणार नाशिक रोड, सिन्नर फाटा सिकलकर वस्ती) अशी अटक केलेल्या दोन आरोपींची नावे आहेत.
सराफा बाजारातील वर्मा ज्वेलर्स या सराफ दुकानाचे शटर उचकटून काही जणांनी १ ऑक्टोबर रोजी सोन्याचे दागिने व रोख रक्कम असा २४ लाख ६८ हजार रुपयांचा ऐवज लुटून नेला होता. जाताना सुरक्षा कर्मचारी आणि स्वच्छता कर्मचाऱ्यांना चाकूचा धाक दाखवून दमदाटी केली होती. याप्रकरणी संतोष सिताराम सहदेव ऊर्फ वर्मा (वय ५७ वर्ष, रा. गुंजाळ हॉस्पिटल, माणिक नगर ता. जि.अहमदनगर) यांनी दिलेल्या फिर्यादीवरून कोतवाली पोलीस ठाण्यात गुन्हा दाखल झाला होता.
गुन्ह्याचे गांभीर्य ओळखून पोलीस अधीक्षक राकेश ओला यांनी आरोपींचा शोध घेऊन तात्काळ अटक करण्याचे आदेश कोतवाली पोलिसांना दिले होते. पोलीस निरीक्षक चंद्रशेखर यादव यांनी आरोपींच्या शोधासाठी तीन पथके तात्काळ वेगवेगळे ठिकाणी रवाना केली. सराफा बाजारातील दुकान फोडण्यापूर्वी आरोपींनी नाशिक मधून मारुती इको कार चोरली होती. चोरीच्या कारमधून नगरमध्ये येऊन सराफा बाजारातील दुकान फोडले.
अहमदनगर, गंगापूर, वैजापूर यामार्गे चोरटे पळून गेल्याचे सीसीटीव्हीमधून लक्षात आल्यानंतर कोतवाली पोलिसांनी त्या दिशेने तपास सुरू केला. दरम्यान येवल्यानजीक रस्त्याच्या कडेला ती मारुती इको कार (MH १५ GR १२०३) कोतवाली पोलिसांना आढळून आली. तो परिसर कोतवाली पोलिसांनी पिंजून काढला.
कोतवाली पोलिसांना खबऱ्यामार्फत माहिती मिळाली की, गुन्हा केलेले दोन आरोपी मुंबईकडे पळून जात आहेत. या माहितीच्या आधारे पोलिसांनी आरोपीच्या वर्णनावरून रेल्वेची माहिती काढून दोघांना नाशिक येथून ताब्यात घेतले. कसून चौकशी केली असता, दोन्ही आरोपींनी इतर सहा साथीदारांच्या मदतीने गुन्हा केल्याची कबुली दिली आहे.
अटक आरोपींकडून ४२.७९० ग्रॅम चोरी गेलेले सोन्याचे दागिने आणि सोने विक्रीचे ९१,००० रू रोख रक्कम असा ३,३४,९०० रुपयांचा मुद्देमाल हस्तगत करण्यात आला आहे. पोलीस निरीक्षक चंद्रशेखर यादव यांच्या मार्गदर्शनाखाली सहायक निरीक्षक विश्वास भान्सी पुढील तपास करीत आहेत.
पोलीस अधिक्षक राकेश ओला, अपर पोलीस अधिक्षक प्रशांत खैरे, उपविभागीय पोलीस अधिकारी अनिल कातकाडे यांच्या मार्गदर्शनाखाली पोलीस निरीक्षक चंद्रशेखर यादव, सहायक निरीक्षक विश्वास भान्सी, फौजदार प्रविण पाटील, गजेंद्र इंगळे, अंमलदार तन्वीर शेख, गणेश धोत्रे, योगेश भिंगारदिवे, सलिम शेख, शाहीद शेख, इस्राईल पठाण, ए. पी. इनामदार, अमोल गाढे, संदिप थोरात, अभय कदम, सोमनाथ राऊत, सुजय हिवाळे, अतुल काजळे, कैलास शिरसाठ, सतिश शिंदे तसेच दक्षिण मोबाईल सेलचे राहुल गुंड यांच्या पथकाने ही कारवाई केली.
