दौलतराव पिसाळ : महान्यूज लाईव्ह
महाबळेश्वरच्या जंगलातील पट्टेरी वाघाची शिकार करून त्याचे कातडे व वाघ नखे यांची तस्करी करण्यासाठी मुंबईला गेलेल्या तीन जणांना सापळा रचून बोरीवली व मुंबई पोलिसांनी जेरबंद करून त्यांच्याकडून दहा लाख रूपये किंमतीचे वाघाचे कातडे व नखांचा पंजा असा मुददे्माल हस्तगत केला आहे.
या घटनेत तिघांवर एमएचबी कॉलनी पोलीस ठाण्यात गुन्हा दाखल करण्यात आला आहे. पोलिस कर्मचारी संदीप आनंदराव परीट यांनी दिलेल्या फिर्यादीवरून सुरज लक्ष्मण कारंडे (वय 30 रा. बिरवाडी ता. महाबळेश्वर), मोहसीन नजीर जुंद्रे (वय 35 रा. रांजणवाडी, महाबळेश्वर) व मंजुर मुस्तफा मानकर (वय 36 रा. नगरपालिका सोसायटी महाबळेश्वर) अशी अटक करण्यात आलेल्या तिघांची नावे आहेत.
या तिघांवर भादवि 9, 39 चा 3, 44, 48 अ, 49 ब, 51 वन्यजीव संरक्षण कायदा अधिनियम 1972 नुसार गुन्हा दाखल करण्यात आला आहे. या संदर्भात पोलिसांनी दिलेली माहीती अशी, गुन्हे प्रकटीकरण विभागातील पोलिस उपनिरीक्षक अखिलेश बोंबे यांना त्यांच्या खबऱ्याकडून माहीती मिळाली की, महाबळेश्वर येथील काही लोक राष्ट्रीय प्राणी असलेल्या पट्टेरी वाघाच्या कातडयाची व त्याच्या वाघ नखांची तस्करी करण्यासाठी एल आय सी मैदान बोरीवली पश्चिम येथे येणार आहेत.
बोंबे यांनी ही माहीती आपले वरीष्ठ अधिकारी पोलीस निरिक्षक सचिन शिंदे व पोलीस निरीक्षक कुडाळकर यांना दिली. या दोन्ही अधिकाऱ्यांनी ही माहीती पोलिस उपायुक्त अजयकुमार बंसल यांना दिली. पोलिस उपायुक्त बन्सल यांनी तातडीने कारवाई करण्याचे आदेश दिले. वरीष्ठांकडुन आदेश मिळताच वरीष्ठ पोलिस निरीक्षक कुडाळकर यांच्या मार्गदर्शनाखाली पोलिस पथकाने सापळा रचला.
वाघाचे कातडे व नखे विक्री करण्यासाठी आलेल्या तिघांना या पथकाने शिताफीने जेरबंद केले. या तीन आरोपींकडून वाघाचे सोलुन काढलेले काळया पिवळया रंगाचे पट्टे असलेले 114 सेंटीमीटर लांब व 108 सेंटीमीटर रूंद वाघाचे कातडे, त्या सोबत 12 वाघनखे असा साधारण 10 लाख 60 हजारांचा मुद्देमाल हस्तगत केला.
वरीष्ठ पोलिस निरीक्षक सुधीर कुडाळकर यांच्या मार्गदर्शनाखालील पथकामध्ये एम एच बी कॉलनी पोलिस ठाण्यातील सहायक पोलिस निरीक्षक भालचंद्र शिंदे, फौजदार अखिलेश बोंबे, हवालदार प्रविण जोपळे, संदीप परीट, प्रशांत हुबळे व गणेश शेरमळे यांनी ही कारवाई केली.
महाबळेश्वरच्या जंगलात मोठया प्रमाणावर बिबटे आहेत, परंतु पट्टेरी वाघ दिसत नाही. वन विभागाचे अधिकारी देखील आपल्या जंगलात पट्टेरी वाघ नाहीत असे सांगतात, परंतु या शिकार प्रकरणाने महाबळेश्वरच्या जंगलात पट्टेरी वाघ आहेत हे सिध्द होत आहेत. या पुर्वी प्रतापगडाच्या पायथ्याला पार गावाच्या शिवारात ब्लॅक पॅथर काही लोकांनी पाहीला होता, परंतु त्या नंतर तो पॅंथर देखिल पुन्हा दिसला नाही.
