बारामती : महान्यूज लाईव्ह
सातत्याने आधुनिक तंत्रज्ञानाचा पुरस्कार करण्यात आणि शेतीला नव तंत्रज्ञानाचा प्रसार करण्यात महत्त्वाचे योगदान देणाऱ्या बारामतीतील एग्रीकल्चरल डेव्हलपमेंट ट्रस्टचा पुन्हा एकदा देशभरात नावलौकिक झाला आहे. नुकत्याच झालेल्या देशभरातील आदर्श रोपवाटिकांच्या मानांकनात महाराष्ट्रातील कृषी विज्ञान केंद्र बारामती आणि राहुरी कृषी विद्यापीठाच्या रोपवाटिकेला थ्री स्टार मानांकन मिळाले आहे.
केंद्र सरकारने संपूर्ण देशातील 806 रोपवाटिकांचे मानांकन केले होते. त्यामध्ये महाराष्ट्रातील 152 रोपवाटिकांचा समावेश होता. सर्व स्तरावर केलेल्या पाहणी, सर्वेक्षण आणि तपासणीत देशभरातील बारा रोपवाटिकांनी थ्री स्टार मानांकन मिळवले. त्यामध्ये महाराष्ट्रातील दोन रोपवाटिकांचा समावेश आहे.
यातही आनंदाची बाब अशी की, विद्यापीठ स्तरावरील राहुरी कृषी विद्यापीठाच्या रोपवाटिकेचा व ॲग्रिकल्चरल डेव्हलपमेंट ट्रस्टच्या बारामतीतील कृषी विज्ञान केंद्राच्या रोपवाटिकेचा थ्री स्टार मानांकन देऊन गौरव करण्यात आला आहे. बारामतीच्या एग्रीकल्चरल डेव्हलपमेंट ट्रस्टचे प्रमुख राजेंद्र पवार हे सातत्याने आधुनिक तंत्रज्ञानाबाबत आग्रही असतात. त्यांच्या मार्गदर्शनाखाली कृषी क्षेत्रातील आधुनिक तंत्राच्या प्रसारासाठी गेल्या पंचवीस वर्षांपासून येथे होत असलेले शेती व शेतीच्या विकासाचे काम हेच या कृषी विज्ञान केंद्राच्या शेतकरीभिमुख कार्याचे गमक आहे.
दरम्यान या गौरवाबद्दल संस्थेचे प्रमुख राजेंद्र पवार, विश्वस्त सौ. सुनंदा पवार, विष्णुपंत हिंगणे, संस्थेचे मुख्य कार्यकारी अधिकारी प्रा निलेश नलावडे यांनी कृषी विज्ञान केंद्राचे डॉ. शिंदे, यशवंत जगदाळे, संतोष करंजे यांच्यासह सर्व विशेषज्ञ व कर्मचाऱ्यांचे कौतुक केले आहे.
