बारामती : महान्यूज लाईव्ह
दरवर्षी 22 जुलैला अजित पवारांचा वाढदिवस असतो. सत्ता असो की नसो त्यांचा हा चाहता त्यांच्यावर निस्सीम प्रेम करतो, मात्र या वाढदिवसाला शुभेच्छा म्हणून द्यायचं काय! तर जे आपल्याजवळ असावं ते द्यावं! या भावनेने तो निस्पृहपणे त्याचा व्यवसाय असलेल्या केस कापण्याच्या उपक्रमातून तो गेली पाच वर्षे अजित पवारांना शुभेच्छा देतोय..!
बारामती शहरातील तांदळवाडी या ठिकाणी असलेल्या बोरावके वृद्धाश्रमामध्ये रहिवासी असलेल्या ज्येष्ठ नागरिकांची मोफत दाढी व कटिंग करून उपमुख्यमंत्री अजित पवार यांना वाढदिवसाच्या शुभेच्छा देत आकाश पगारे हे अजितदादांचा वाढदिवस आगळे वेगळ्या पद्धतीने साजरा करतात.
वाढदिवसाच्या एक दिवस आधी म्हणजे आज शुक्रवारी त्यांनी नियमितपणे हा उपक्रम पार पाडला. या प्रसंगी बोरावके वृद्धाश्रमाचे सचिव किशोर मेहता, उपाध्यक्ष राजेंद्र बोरावके, फक्रुद्दीन बोहरी, अमित बोरावके, अभय शहा, डॉ अजिंक्यराजे निंबाळकर, डॉ, अजित आंबर्डेकर, डॉ सई सातव, उद्योजक सुरेंद्र भोईटे, वृद्धाश्रमाचे व्यवस्थापक किरण शेळके आदी उपस्थित होते.
सुर्यनगरी मध्ये बी. ए सलून अँड टॅटूज च्या माध्यमातून व्यवसाय करणारे आकाश पगारे हे गेल्या काही वर्षांपासून हा उपक्रम राबवत आहेत. अर्थात विविध आजारामुळे सलूनमध्ये ज्येष्ठ नागरिक येऊ शकत नाही, म्हणून त्यांच्याच घरी जाऊन व्यवसाय करताना सदर कल्पना सुचली व उपक्रम सुरू केला. सदर उपक्रम मोफत दोन दिवस चालतो. सामाजिक बांधिलकी जोपासत सदर उपक्रम गेल्या पाच वर्षांपासून राबवित असतो.
या माध्यमातून ज्येष्ठाची सेवा करण्याचे भाग्य लाभते व बुके, हार, तुरे ,फ्लेक्स, आदींवर खर्च न करता मोफत दाढी कटिंग चा उपक्रम राबवित असल्याचे आकाश पगारे यांनी सांगितले. हा उत्तम व आदर्शवत उपक्रम असून ज्येष्ठ नागरिक समाधान व्यक्त करत असल्याचे वृद्धाश्रमाचे सचिव किशोर मेहता यांनी सांगितले.
