दौंड : महान्यूज लाईव्ह
दौंड तालुक्यात रात्रीचे नव्हे तर आता भरदिवसा आणि तेही भर दुपारी घरफोडी होण्याचे प्रकार घडू लागले आहेत. तालुक्यातील कानगाव व गार हद्दीत अज्ञात चोरट्यांनी भर दुपारी तीन घरांची घरफोडी करून घरातील अंदाजे १५ ते १६ मौल्यवान सोने चांदी व काही रोख रक्कम चोरून पोबारा केल्याची घटना घडली आहे.
या चोरीच्या घटनेमुळे कानगाव व गार परिसरात अज्ञात चोरट्याने दहशत निर्माण केल्याने घबराट निर्माण झाली आहे. याबाबत मिळालेली माहिती अशी की, मंगळवारी (दिनांक ४) दुपारी दोन ते चार वाढण्याच्या दरम्यान या चोरीच्या घटना घडल्या आहेत. कानगाव ते हातवळण रोडवर कानगाव हद्दीत असलेल्या रोहिदास चौधरी यांच्या घरात अज्ञात चोट्याने प्रवेश करून घरातील सोने-चांदीचा मौल्यवान ऐवज चोरून नेला तर काळुराम मोरे यांच्या ही घरात प्रवेश करून चोरट्यांनी सोने चांदीचा ऐवज चोरी केली आहे.
कानगाव गार रोडवर गार हद्दीत बाबासाहेब मरळ त्यांच्या घरातील सोने चांदीचा तसेच काही रोख रक्कम ही या अज्ञात चोरट्यांनी चोरी करून लंपास केल्याची घटना घडली आहे. एकाच दिवशी आणि तेही भरदुपारी कानगाव व गार गावच्या हद्दीत या चोरीच्या घटना घडल्याने मोठी खळबळ उडाली असून नागरिकांमध्ये घबराट पसरली आहे. सध्या थोड्याफार प्रमाणात पाऊस झाल्याने या भागातील शेतकऱ्यांची शेतातील शेत कामांची लगबग सुरू आहे. त्यामुळे याचाच फायदा घेत अज्ञात चोरट्यांनी रस्त्यालगत असलेल्या तीन घरांची भर दुपारी घरफोडी करून चोरी केल्याची घटना घडली आहे.
दरम्यान, घटनेची माहिती मिळताच दौंड उपविभागीय पोलीस अधिकारी स्वप्निल जाधव, पोलीस निरीक्षक हेमंत शेडगे, पोलीस उपनिरीक्षक संजय नागरगोजे आदींनी घटनास्थळी भेट घेऊन पाहणी केली आहे. या अज्ञात चोरांचा शोधासाठी पथके तैनात केली असून त्यांना लवकरच जेरबंद केले जाईल. नागरिकांनी आपले घर व्यवस्थित बंद करावे, काळजी घ्यावी तसेच आजूबाजूला अनोळखी व संशयित अज्ञात व्यक्ती दिसल्यास त्वरित पोलिसांशी संपर्क साधावा असे आवाहनही पोलिसांकडून करण्यात आले आहे.
