सुरेश मिसाळ : महान्यूज लाईव्ह
इंदापूर : इंदापूर तालुक्यातील उजनीच्या तीरावरील शहा येथे आयोजित करण्यात आलेल्या बैलगाडा शर्यतीचा थरार रंगला. अकरा वर्षाच्या कालावधीनंतर दुसऱ्यांदा बैलगाडा शर्यतीचा भिर्रर्र… आवाज पाणलोट क्षेत्रात घुमला.दरम्यान शर्यतीसाठी घाटाची निर्मिती उजनी धरण पात्राच्या तीरावर करण्यात आल्याने व घाटाची रचना सदोष असल्याने शर्यती दरम्यान एक गाडा थेट नदीच्या पात्रात घुसला.
त्यामुळे आयोजकांसह प्रेक्षकांची चांगलीच तारांबळ उडाली. बैलगाडा शर्यती दरम्यान नदीपात्रात घुसलेल्या बैल गाड्या सह चालक सुखरूप बाहेर आल्याने दोन बैलांसह चालकाचा जीव वाचवण्यात यश आले.मात्र शर्यतीदरम्यान दोन जण जखमी झाले आहेत.
राजमाता अहिल्याबाई होळकर यांच्या जयंतीनिमित्त व माजी राज्यमंत्री आ. दत्तात्रय भरणे यांच्या वाढदिवसानिमित्त इंदापूर तालुक्यातील शहा येथे बैलगाडा शर्यतीचे आयोजन करण्यात आले होते.
दरम्यान शर्यतीच्या वेळी झालेल्या अपघातात जेष्ठ नागरिक शिवाजी बाबू गंगावणे (रा.शहा ता.इंदापूर)हे गंभीर जखमी झाले. तर अन्य दोन जणही जखमी झाले. त्यांना पुढील उपचारासाठी इंदापूर मधील उपजिल्हा रुग्णालयात उपचारसाठी दाखल करण्यात आले. तर एक प्रेक्षक घाटाच्या मध्येच गेल्याने तोही जखमी झाल्याचे समजते. असे प्रकार यापुढे घडू नयेत म्हणून अयोजकांसह प्रशासनाने योग्य ती खबरदारी घेणे गरजेचे आहे.
बैलगाडा शर्यतीमधील विजेत्याला आमदार केसरीचा मानाचा किताब व एक लाख दहा हजार रुपये रोख रक्कम देण्यात आली. या वेळी स्पर्धेचे आयोजक अमोल पाटील (रा. शहा) यांच्या राहूल्या व संजय चव्हाण (रा. खोरोची) यांच्या भवानी नावाच्या संयुक्त बैलजोडीने प्रथम, शौर्य दैवत गोवेकर (रा. लोणंद) द्वितीय आणि बापुजी बुवा (रा.जांभळवाडी) तृतीय क्रमांक पटकावला.
या स्पर्धेसाठी राज्यातील नामांकित बैलगाडा चालक आणि मालकांनी आपला सहभाग नोंदविला होता. राज्यातील अनेक वेळा हिंदकेसरी ठरलेला बकासुर या बैलाने सर्वांचे लक्ष वेधून घेतले होते. बैलगाडा शर्यतीचे आयोजन अमोल ऊर्फ सोनू पाटील व विश्वजीत मारकड यांनी केले होते.
