इंदापूर : महान्यूज लाईव्ह
मागील काही दिवसांपासून राष्ट्रवादी- भाजपचा दुधावरील वाद चहाच्या पेल्यावरून आता थेट कोरोनावर पोचला. कोरोनाने देश सोडा, जगात कोणालाच सोडले नसले तरी आज इंदापूर तालुक्यात मात्र थेट कोरोनाचाच विचका राजकारणाने केला.. कोरोना केअर सेंटरचे आज राज्यमंत्री दत्तात्रेय भरणे यांच्या हस्ते नियोजित उदघाटन संध्याकाळी होणार असतानाच भाजपने हे सेंटर आम्हीच आणले असा दावा करीत दुपारीच त्याचे प्रतिकात्मक उदघाटन करून टाकले. पंचायत समितीच्या सभापती, उपसभापतींनी या कोविड केअर सेंटरचे उदघाटन केल्याने आता इंदापूर तालुक्यात राजकीय वादापुढे कोरोनाची देखील खैर राहीली नाही असेच चित्र निर्माण झाले…
भिगवण येथील ट्रामा सेंटरमध्ये कोविड केअर सेंटर सुरू करण्यात आले आहे. याचे औपचारिक उदघाटन आज संध्याकाळी वनराज्यमंत्री दत्तात्रेय भरणे करणार होते. त्याची तयारीही त्यानुसार सुरू होती. मात्र हे सेंटर आम्हीच पाठपुरावा करून आणले व मागणीही आम्हीच केली होती असा दावा करीत भाजपच्या वतीने इंदापूर पंचायत समिती सभापती, उपसभापतींनी अचानकच त्याचे उदघाटन करून टाकले व आमच्या कामाचे आम्हीच उदघाटन करणार असा दावा केला.
इंदापूर विधानसभेची निवडणूक १० महिन्यांपूर्वी झाली, मतदानातील काट्याची टक्कर त्यानंतरही चालेल असे कोणालाच वाटले नव्हते. मात्र एकमेकांची कॉपी करीत, भेटीगाठींतून व कार्यकर्त्यांद्वारे सोशल मिडियात राष्ट्रवादी व भाजप ही लढाई सुरूच राहीली. कोरोनाच्या काळात राज्यमंत्र्यांनी काहीच केले नाही, अशी टिका भाजपने केली. तर कोरोनाच्या काळात संपूर्ण तालुक्यात दत्तात्रेय भरणे यांनी स्वतः पुढाकार घेऊन गरजू लोकांना गावागावात जाऊन जीवनावश्यक वस्तू दिल्या, खुद्द माजी मंत्री हर्षवर्धन पाटील यांच्या बावडा गावातही त्यांनी काही मदत केली नाही असा पलटवार राष्ट्रवादीने पाटील यांच्यावर केला. पुढे हा आरोप दुधावरती घसरला. दुधगंगा संघाच्या अवसायनाच्या नोटीशीवरून सुरू झालेला वाद काल-परवा उच्च न्यायालयाच्या आदेशानंतर थंडावला. मात्र मध्येच वनखात्याच्या हद्दीतील अतिक्रमण हटवण्यावरूनही भाजपने वनराज्यमंत्री भरणेंना लक्ष्य केले. त्यानंतर आता दुध दराच्या आंदोलनातही व नागपंचमीच्या दिवशी सुरफाट्या खेळण्यावरून आरोप प्रत्यारोप झाले. त्यानंतर भरणे यांनी थेट कोविड सेंटरमध्येच जाऊन या राजकारणात बाजी मारली. आज मात्र आजवर सोशल मिडीयात सुरू असलेल्या राजकीय वाकयुध्दाचे जरा अतीच झाले. भिगवण येथील ट्रामा सेंटरचे रुपांतर कोविड केअर सेंटर मध्ये करण्यात आले आहे, त्याचे उदघाटन राज्यमंत्री भरणे करणार आहेत. हा कार्यक्रम संध्याकाळी आहे. मात्र तत्पूर्वीच या कोविड केअर सेंटरचे भाजपने उदघाटन करून टाकले आणि राजकीय वातावरण पेटवले. आता हे उदघाटन राष्ट्रवादी कोणत्या पध्दतीने घेते व त्याला कसे प्रत्युत्तर देते याकडे साऱ्यांचेच लक्ष लागून राहीले आहे.
संजय देहाडे, उपसभापती, पंचायत समिती, इंदापूर – हे ट्रामा सेंटर माजी मंत्री हर्षवर्धन पाटील यांनीच त्यांच्या मंत्रीपदाच्या काळात मंजूर करून आणले होते, त्याच्या कामाला मागील पाच वर्षात कधी गती दिली नाही. आताही भिगवण एका बाजूला असल्याने व तेथे कोरोनाचे रुग्ण वाढू लागल्याने हर्षवर्धन पाटील यांच्या माध्यमातून भाजपनेच कोविड केअर सेंटर होण्यासाठी पुढाकार घेतला होता व त्यासाठी पाठपुरावाही केला होता, मात्र त्याचे राजकारण करून तेथे उदघाटनाचा घाट घातला जात होता. त्यामुळे आम्ही त्याचे रितसर उदघाटन केले.
सचिन बोगावत, शहराध्यक्ष राष्ट्रवादी कॉंग्रेस – कोरोनाचे कोणीही राजकारण करू नये. भिगवणमध्ये राष्ट्रवादीची सत्ता आहे. जिल्हा परीषदेचे सदस्य आहेत. मुळात राज्यमंत्री दत्तात्रेय भरणे यांच्या माध्यमातून आम्ही हे सेंटर सुरू व्हावे म्हणून तहसीलदार, गटविकास अधिकारी यांच्यापर्यंत सातत्याने पाठपुरावा केला. राज्यमंत्री भरणे यांनी सर्व पाठबळ दिले. अगदी टॅंकर सुरू करण्यापासून, खाटा आणण्यापासून आम्ही नियोजन केले आहे. या सेंटरचे औपचारिक उदघाटन आम्ही करण्यासाठी सभापती, उपसभापतींना नियमानुसार आमंत्रण दिले होते. मात्र कोरोनाच्या काळात अडचणी सोडवायच्या बाजूला राहून उदघाटनाच्या नावाखाली स्टंटबाजी करण्यात आली, हे दुर्दैवाचे आहे. या तालुक्यातील विकासासाठी राज्यमंत्री निधी आणत आहेत. त्यांना मदत करण्याऐवजी अशा पध्दतीचे राजकारण करणे गैर आहे.
