पुणे : महान्यूज लाईव्ह
कोरोना च्या दुसऱ्या लाटेचा प्रभाव कमी होऊन राज्य पूर्वपदावर येत असतानाच राज्याच्या आरोग्य मंत्र्यांनी आणि उपमुख्यमंत्र्यांनी पुन्हा एकदा जनतेच्या काळजाचा ठोका चुकवला आहे. दक्षिण आफ्रिकेतील कोरोनाच्या व्हेरीएंटमुळे महाराष्ट्रातील सुरू असलेल्या शाळा आणि सुरू असलेले वातावरण यावर परिणाम होण्याची शक्यता आहे.
शाळा सुरू करण्याबाबत उद्याच्या बैठकीत निर्णय होईल अशी माहिती आरोग्य मंत्री राजेश टोपे यांनी दिली असून उपमुख्यमंत्री अजित पवार यांनी 31 डिसेंबर पूर्वी राज्यातील निर्बंध याबाबत पुन्हा नव्याने आढावा घेण्याचे संकेत दिले आहेत. आज पत्रकारांशी बोलताना राजेश टोपे यांनी या संदर्भातील अधिक माहिती दिली. दक्षिण आफ्रिकेत आढळलेला नवा व्हेरीएंट झालेले लसीकरण देखील निष्प्रभ करण्याची चिन्हे आहेत. हा चिंतेचा विषय असून भारतात अजून हा व्हेरीएंट सापडलेला नाही.
परंतु दक्षिण आफ्रिकेतून येणाऱ्या प्रत्येक लोकांवर लक्ष ठेवण्याची गरज असल्याने राज्य सरकारने त्या पद्धतीने नियोजन केले आहे. दक्षिण आफ्रिकेतून येणाऱ्या प्रवाशांवर क्वारंटाईन ची सक्ती केली असून 72 तासांपूर्वी केलेला rt-pcr टेस्ट चा अहवाल त्यांना बंधनकारक करण्यात आला आहे. असे टोपे यांनी सांगितले दरम्यान दुसरीकडे 1 डिसेंबर पासून पहिली ते चौथीपर्यंतच्या शाळा सुरू करण्याचा निर्णय झाला आहे. या निर्णयाला काही हरकत नाही, मात्र शाळा सुरू करण्यासंदर्भात उद्याच्या बैठकीत अंतिम निर्णय होईल असे ते म्हणाले. नवा विषाणू आढळल्याने दक्षिण आफ्रिकेकडे ये-जा करणारी विमाने बंद करण्यासंदर्भात आम्ही केंद्र सरकारला विनंती केली आहे असेही त्यांनी सांगितले.
दरम्यान उपमुख्यमंत्री अजित पवार यांनी देखील आज पुण्यामध्ये या संदर्भातील संकेत दिले. दक्षिण आफ्रिकेतील कोरोना च्या नव्या विषाणूमुळे राज्यांमधील कोरोनाविषयक निर्बंध हटवण्याच्या प्रक्रियेला देखील अडथळा येऊ शकतो असे अजित पवार यांनी सांगितले.
पुणे शहर आणि पिंपरी-चिंचवडमधील जम्बो कोविड सेंटर तूर्तास सुरू करण्यात येणार असून 31 डिसेंबरनंतर त्यासंदर्भात निर्णय घेतला जाईल असे पवार यांनी सांगितले. दक्षिण आफ्रिकेमध्ये ओमीक्रोम नावाचा नवा विषाणू आढळला आहे. या पार्श्वभूमीवर सध्या राज्य सरकारकडून देखील काळजी घेतली जात असल्याचे पवार यांनी सांगितले. 1 डिसेंबर पासून सिनेमागृह, नाट्यगृह पूर्ण क्षमतेने सुरू करणार असल्याचे अजित पवार यांनी स्पष्ट केले.
