महान्यूज लाईव्ह रिपोर्ट
राजकारणात काहीही होऊ शकते हे जरी खरे असले तरी शरद पवार यांच्या सारख्या ज्येष्ठ नेत्याचा फोटो मॉर्फ केला जाईल आणि जिथे ते गेले नाहीत तिथे ते गेल्याचा संभ्रम निर्माण करण्याचा प्रयत्न केला जाईल हे मात्र राजकारणात वावरणाऱ्यांसाठीही धक्कादायक आहे. काल भाजपाचे माजी मुख्यमंत्री देवेंद्र फडणवीस दिल्लीत होते. तसेच भाजपाचे प्रदेशाध्यक्ष चंद्रकांत पाटीलही दिल्लीत होते. त्यानंतर शरद पवार दिल्लीला गेल्याची पहिली बातमी आली. या बातमीनंतर संभ्रम पसरविण्याची मोहीम सुरू झाली.
यानंतर पहिली बातमी आली, ती पवारसाहेब सर्व नियोजित कार्यक्रम रद्द करून अचानक दिल्लीचा गेल्याची..! ही बातमी व्हायरल करून काहीतरी मोठी राजकीय घडामोड होत असल्याचा संभ्रम निर्माण केला गेला. यानंतर राष्ट्रवादीकडून असे काहीही नसून पवारसाहेब नियोजित कार्यक्रमानूसार ठरलेल्या संरक्षण विभागाच्या बैठकीसाठी दिल्लीला गेल्याचे सांगितले गेले. परंतू नंतरही ” अचानक ” दिल्ली गाठल्याची माहिती सोशल मिडियावर फिरतच राहिली.
यानंतर रात्री एक फोटो अचानक सोशल मिडियावर फिरायला सुरुवात झाली. या फोटोत फडणवीसांच्या बाजूला पवारसाहेब बसलेले दिसतात, याच फोटोत समोर अमीत शहा बसलेले आहेत. यातून फडणवीसांसोबत शरद पवारांनी अमित शहा यांची भेट घेतलेली आहे असा अर्थ निघतो. हा फोटो अनेक व्हाटसएप ग्रुपवर फिरला, अर्थात तो फिरवला जास्त गेला..!
वस्तुस्थिती काय आहे?
यात आणखी लक्षात घेण्यासारखी गोष्ट म्हणजे इतर वेळी ज्यावेळी फडणवीस दिल्लीत कोणा मोठ्या नेत्याला भेटतात, त्यावेळी त्या भेटीचे फोटो लगेचच सोशल मिडियावर बघायला मिळतात. मात्र यावेळेस ते फोटो सोशल मिडियावर आले नाहीत. ते आले नाहीत याचे कारण, जर ते फोटो आले असते तर फडणवीस यांनी एकट्यानेच अमीत शहांची भेट घेतल्याचे तेव्हाच स्पष्ट झाले असते. पण तसे झाले नाही आणि जाणीवपूर्वक ” मोठ्या राजकीय घडामोडींच्या ” चर्चेला उधाण आले.
वस्तुतः शरद पवार हे इस्त्रायली देशदूत कोब्बी सोशनी यांच्याशी चर्चा करतानाचा तो फोटो होता. बारामती आणि इस्त्रायलचे नाते खूप दिर्घकाळचे आहे. पद्मश्री स्वर्गीय अप्पासाहेब पवार यांनी महाराष्ट्रात व भारतातही पहिल्यांदा ठिबक सिंचन आणले, ते इस्त्रायलच्या मदतीने! शोशनी यांच्या या भेटीदरम्यान बारामतीतील कृषी विकासावर अधिक चर्चा झाली होती.
त्यानंतर काही वेळाने राष्ट्रवादीचे प्रवक्ते नबाब मलिक यांनी सदरचा फोटो हा बनावट असल्याचे स्पष्ट केले. या फोटोत पवार यांचा दुसऱ्या भेटीतील फोटो कटपेस्ट करून फडणवीसांचा जो फोटो अमित शहांशी चर्चा करताना आहे, त्या फोटोमध्ये मॉर्फ करून पवार यांचे छायाचित्र बाजूला लावण्यात आल्याचे स्पष्ट झाले. आजच्या आधुनिक जमान्यात अशा गोष्टी करणे अगदी सहजशक्य आहे, परंतू कोणी शरद पवार यांच्या बाबतीत असे करू शकेल यावर विश्वास बसणे थोडे अवघड आहे. राष्ट्रवादीने खुलासा करण्यापूर्वी आणि केल्यानंतरही फडणवीस यांना पत्रकारांनी या कथित भेटीबाबत विचारले, तेव्हा ते देखील केवळ हसून संभ्रम वाढविण्याचा प्रयत्न करताना दिसले.
