सुरेश मिसाळ : महान्यूज लाईव्ह
राज्यातील साखर उद्योगात इंदापूर तालुक्यातील शहाजी नगर येथील निरा-भीमा सहकारी साखर कारखान्याने क्रांतीकारक पाऊल टाकले आहे. आता निरा भीमा साखर कारखाना सीएनजी गॅस निर्मितीचा प्रकल्प कार्यान्वित करणार आहे.
निरा भीमा कारखान्याच्या माध्यमातून चालू वर्षी देशातील पहिला बायो सीएनजी प्रकल्प सुरू करण्यात येणार असून यंदाच्या गळीत हंगामापासून कारखान्याचे ऊस वाहतुकीचे 250 ट्रॅक्टर सीएनजी गॅसवर धावणार आहेत अशी माहिती कारखान्याचे संस्थापक, वसंतदादा शुगर इन्स्टिट्यूटच्या गव्हर्निंग कौन्सिलचे सदस्य, माजी सहकार मंत्री हर्षवर्धन पाटील यांनी दिली.
मांजरी बु.पुणे येथे वसंतदादा शुगर इन्स्टिट्यूट हर्षवर्धन पाटील यांच्या अध्यक्षतेखाली याविषयी आज बैठक पार पडली. या बैठकीस व्हीएसआयचे महासंचालक शिवाजीराव देशमुख, विशेष कार्य अधिकारी संभाजीराव कडू-पाटील, नॅचरल शुगरचे अध्यक्ष बी. बी. ठोंबरे, प्रा. एस. व्ही. पाटील, केंद्र सरकारच्या मध्यवर्ती रस्ते वाहतूकचे अधिकारी राजेंद्र सानेर-पाटील, विविध मॅन्युफॅक्चरिंग कंपनीचे वरिष्ठ अधिकारी, निरा भिमा कारखान्याचे कार्यकारी संचालक डी. एन. मरकड, के.ए.गायकवाड आदी उपस्थित होते.
राज्यात नीरा भीमासह एकूण 5 साखर कारखान्यांमध्ये सीएनजी गॅसवर प्रायोगिक तत्त्वावर ट्रॅक्टर चालविण्यात येणार आहेत. ट्रॅक्टरच्या इंधन खर्चात सीएनजी गॅस वापरामुळे सुमारे 50 टक्के बचत होणार असून ट्रॅक्टरची कार्यक्षमता वाढून प्रदूषणातही घट होणार आहे.
शिवाय कारखान्यांचा ऊस वाहतुकीचा खर्च कमी होऊन त्याचा फायदा ऊस उत्पादक शेतकऱ्यांना अधिकचा दर देण्यासाठी होणार असल्याची माहिती हर्षवर्धन पाटील यांनी दिली. भविष्यात इंदापूर तालुक्यातील व परिसरातील शेतकऱ्यांना शेतामध्ये ट्रॅक्टर चालवण्यासाठी सीएनजी गॅस उपलब्ध करून देण्याचे कारखान्याची धोरण आहे.
त्यामुळे ट्रॅक्टर मालकांच्या इंधन खर्चात मोठी बचत होऊन मोठा आर्थिक फायदा होणार आहे. वाहनांच्या वाढत्या इंधन खर्चात बचत करणेसाठी सीएनजी गॅस वापरणे हाच एकमेव प्रभावी उपाय असल्याचेही हर्षवर्धन पाटील यांनी यावेळी बोलताना स्पष्ट केले.
