संदीप मापारी पाटील, बुलढाणा
लोणार तालुक्यातील आरडव ते पहुर रस्त्याच्या कामाची चौकशी करण्याची मागणी भाजपा महिला जिल्हा सचिव सत्यभामा मुंडे यांनी सार्वजनिक बांधकाम मंत्री यांच्याकडे एका निवेदनाद्वारे केली आहे.
निवेदनात नमूद केल्याप्रमाणे लोणार तालुक्यातील आरडव ते पहूर ह्या रस्त्याचे डांबरीकरणाचे काम सुरू आहे. हे काम अत्यंत निकृष्ट होत असून, सदर कंत्राटदाराने या रस्त्यात मुरुमा ऐवजी काळी मातीचा वापर केला आहे. पहिला रस्ता हा पूर्णपणे उखडून टाकून त्यावर परत नवीन गिटी टाकून डांबरीकरण करणे आवश्यक होते.
परंतु असे न करता पहिल्या रस्त्यावरच थातुरमातुर डांबर टाकून तसाच रस्ता बनविण्याचे काम सुरू आहे. तसेच हा रस्ता कुठे कुठे अरुंद होत आहे. सध्या पावसाळा सुरू असल्याने अनेक ठिकाणी रस्ता पाण्याने वाहून जात आहे.
तसेच त्या ठिकाणी चिखल होत आहे. या रस्त्यामध्ये जे पूल बनवण्यात आले, त्याचे काम सुद्धा निकृष्ट झाले आहे. दाभा या ठिकाणी गावालगत दोन्ही बाजूने नाले करण्यात यावेत आणि ह्या सर्व कामाची गुणवत्ता नियंत्रण विभागामार्फत चोकशी करण्यात यावी.
अन्यथा बांधकाम विभाग कार्यालय मेहकर यांच्यासमोर तीव्र आंदोलन करण्यात येईल व याची सर्वस्वी जबादारी बांधकाम विभागाची राहील असा इशारा भारतीय जनता पक्षाच्या जिल्हा सत्यभामा मुंडे यांनी या निवेदनाअंती दिला आहे.
