दौलतराव पिसाळ : महान्यूज लाईव्ह
वाई : येथील हरिहरेश्वर बँकेमध्ये ११२ बनावट कर्ज प्रकरणे करुन तब्बल ३७ कोटी ४६ लाख ८९ हजार ३४४ रुपयांचा आर्थिक गैरव्यवहार केल्याप्रकरणी जिल्हा लेखापाल विजय सांवत यांनी बँकेचे चेअरमन, व्हाईस चेअरमन, संस्थापक संचालक २९ जणांवर वाई पोलीस ठाण्यात गुन्हा दाखल केला आहे. यामुळे जिल्ह्याच्या सहकार क्षेत्रात खळबळ उडाली आहे.
संस्थापक संचालक नंदकुमार खामकर व वजीर शेख यांनी संचालक व कर्मचार्यांशी संगनमत करुन स्वतच्या फायद्यासाठी पैशाचा गैरवापर केल्याचे तक्रारीत म्हटले आहे. वाई पोलिसांनी दिलेली माहिती अशी, की विजय सावंत यांनी दिलेल्या फिर्यादीनुसार हा गुन्हा दाखल करण्यात आला.
यामध्ये हरिहरेश्वर बँकेचे चेअरमन अजित गुलाबराव खामकर, व्हाईस चेअरमन जगन्नाथ बाजीराव सावंत, संस्थापक संचालक नंदकुमार ज्ञानेश्वर खामकर, संचालक वजीर कासमभाई शेख, मनोज श्रीधर खटावकर, प्रकाश केरबा ओतारी, विलास गणपत खामकर, चंद्रकांत धर्माजी शिंदे, विष्णूपंत शंकर खरे, अर्जुन दिगंबर खामकर, जनार्दन आनंदा वैराट, किरण भास्कर कदम, सौ. जयश्री वसंत चौधरी, सौ. जयमाला विजय खामकर,
तज्ञ संचालक गोविंद तुकाराम लंगडे, अरुण महादेव केळकर, संतोष शिवाजी चोरगे, व्यवस्थापक रमेश दगडू जाधव, वाईचे शाखा प्रमुगा विनोद मनोहर शिंदे, खंडाळय़ाचे शाखा प्रमुख रणजित खाशाबा शिर्के, वडूथचे शाखा प्रमुख सुनील चंद्रकांत वंजारी, भुईंजचे शाखा प्रमुख वसंत आनंदा सणस,
वाई शाखेचे रोखपाल सुचित महादेव जाधव, वडूथ शाखेचे रोखपाल महेश प्रताप शिंदे, भुईज शाखेचे रोखपाल दीपक धर्माजी शिर्के, खंडाळा शाखेचे रोखपाल तानाजी मानसिंग भोसले, सनदी लेखपाल राहुल धोगंडे, डी. बी. खरात, एन. एस. कदम यांनी २०११ ते दि. ३१ मार्च २०१९ च्या दरम्यान हरिहरेश्वर डेव्हलपर्स वाई या फर्मच्या नावाने सोनगिरवाडी येथील सर्व्हे नंबर. ७१/२ व सर्व्हे नंबर २५/१अ/२/३ या मिळकतीवर ६२ कर्जदारांच्या नावे बनावट कागदपत्रे व
दस्तऐवज तयार करुन गहाणखत व कर्जप्रकरणे दाखवली.
बांधकाम केलेल्या सदनिका कर्जदारांना दिल्याचे दाखवून कर्ज घेवून बँकेची, सभासदांची व ठेवीदारांची फसवणूक केली आहे. दरम्यान यातील सहा जण मयत झालेले आहेत. तसेच वजीर कासमभाई शेख यांनी सिटी सर्व्हे नंबर १२२४,२०२४, ६६५, ५८७, ३२७ सर्व्हे नंबर १०८/२ या मिळकतीवर एशियन डेव्हलपर्स या फर्मचे नावे ५० कर्जदारांच्या नावे बनावट कागदपत्रे व दस्तऐवज तयार करुन गहाण खत व कर्ज प्रकरणे दाखवून बांधकाम केलेल्या सदनिका कर्जदारांना दिल्याचे दाखवून बँकेतून संबंधितांच्या नावे कर्ज घेवून बँकेच्या सभासदांची व बँकेची
व सभासदांची फसवणूक केली आहे.
पदाचा गैरवापर करुन स्वतःच्या आर्थिक फायद्याकरता सभासद, ठेवीदार यांचा
विश्वासघात करुन ११२ बनावट कर्जप्रकरणे तयार करुन बँकेची २६ कोटी ८७ लाख ८ हजार ७८९ रुपयांचा गैरविनीयोग केलेला आहे.
हरिहरेश्वर बँकेच्या २०१५-१६, २०१६-१७, २०१८-१९ या कालावधीत प्रत्यक्षात बनावट कर्ज खात्यावर रक्कमेचा भरणा न करता ११२ कर्ज खात्यावर रक्कम भरणा केल्याचे दाखवून १० कोटी २४ लाख ४२ हजार १५४ एवढय़ा
रक्कमेचा अपहार केला आहे.
तसेच भद्रेश्वर नागरी सहकारी पतसंस्था यांनी हरिहरेश्वर बँकेत ठेवलेल्या व परत काढून घेतलेल्या गुंतवणूकीवर बनावट ठेव तारण कर्ज प्रकरण तयार करुन ती रक्कम बँकेच्या बनावट कर्ज खात्यावर भरणा केली.
पुढे भद्रेश्वर पतसंस्थेचे ठेव तारण कर्ज निरंक
करण्यासाठी छ. संभाजी महाराज पतसंस्था पिंपोडे शाखा वाई, किसान नागरी सहकारी पतसंस्था वाई यांनी बँकेत ठेवलेल्या व परत केलेल्या गुंतवणूकीवर ठेवतारण कर्ज निर्माण करुन ४४ लाख ३८ हजार ४०१ रुपयांचा अपहार केला आहे.
हरिहरेश्वर बँक वाई या बँकेतील आर्थिक निधीचा गैरविनियोक व अपहार करुन बँकेच्या ठेवीदारांची, सभासदांची ३७ कोटी, ४६ लाख, ८९ हजार ३४४ रुपयांची फसवणूक केली आहे. त्यामुळे २९ जणांवर आयपीसी ४२०, ४६४, ४६५, ४६७, ४६८, ४७१, ३४ महाराष्ट्र सहकारी संस्था १९६० चे कमल ८१(५)(ब) ठेवीदार हितरक्षण अधिनियम १९९९ चे कलम ३ प्रमाणे गुन्हा दाखल झाला असून पोलीस निरीक्षक आनंदराव खोबरे अधिक तपास करत आहेत.
