तुमच्या आवडीच्या डेलीसोप मालिकांचे पुढचे भाग आता पाहू शकाल…
टिम महान्यूज लाईव्ह
गेली दोन ते अडीच महिने चित्रपट, दूरचित्रवाहिनीवरील मालिकांचे चित्रीकरण बंद होते, त्यामुळे प्रेक्षकांना पुन्हा-पुन्हा त्याच मालिकांचे जुने भाग दाखवले जात होते, मात्र आता पुढे काय होणार याची प्रतिक्षा असलेल्या प्रेक्षकांची प्रतिक्षा संपेल आणि मालिकांमध्ये काम करणाऱ्या कलाकारांपासून ते कर्मचाऱ्यांपर्यंत साऱ्यांच्या पोटापाण्याचीही चिंता मिटेल. सरकारने चित्रीकरणास परवानगी दिली आहे.
राज्य सरकारकडे राज्यातील चित्रपट निर्माते, दिग्दर्शक आणि कलाकारांच्या संघटनांनी पाठपुरावा सुरू केला होता. कोरोनाच्या काळात लॉकडाऊनमध्ये सर्व प्रकारच्या चित्रपट, मालिकांचे चित्रीकरण बद होते. त्यामुळे रसिक प्रेक्षकांना त्यांच्या आवडीच्या मालिकांमध्ये पुढे काय झालेय हे कळायचे बद झाले. मात्र या काळात छोटा पडदा बंद राहू नये यासाठी त्याच मालिकांचे जुने भाग दाखविले जात होते.
आता सरकारने अनलॉक-१ च्या वाढीव लॉकडाऊनमध्ये या चित्रीकरणाबाबत सकारात्मक विचार करून काही अटींवर परवानगी दिली आहे. यामध्ये सोशल डिस्टन्सिंगबरोबरच चित्रीकरण स्थळी स्वच्छता, गर्दी टाळण्याचे उपाय यासह काही अटी घातल्या असून या अटी न पाळल्यास परवानगी असलेले चित्रीकरणही बंद केले जाईल असा इशारा सरकारी सूत्रांनी दिला आहे. अर्थात सरकारने परवानगी दिल्याने मुंबईतील कलाकारांमध्ये आनंदाचे वातावरण आहे.
