राजेंद्र झेंडे,महान्यूज लाईव्ह
दौंड : पुणे सोलापूर महामार्गावरून लातुर ते निलंगा (मुंबई ) एसटी बसमधून प्रवास करणारा चार प्रवाशांना तीन जणांनी पोलीस असल्याचे सांगत एसटीमधून मारहाण करीत खाली उतरवून त्यांच्याकडील रोख रक्कम आणि इतर मौल्यवान वस्तु अशा 1 कोटी 12 लाख 36 हजार 860 रुपयांचा ऎवज लुटून अज्ञात चार इसम दुचाकीवर पुणे आणि सोलापूर दिशेने पसार झाले आहेत.
ही घटना मंगळवारी (दि.3) रात्री 1.15 वाजण्याच्या सुमारास पाटस हद्दीतील ढमाले वस्तीजवळ घडली अशी माहिती पोलीसांनी दिली. दरम्यान, या घटनेनंतर स्थानिक गुन्हे अन्वेषण विभाग आणि यवत पोलीस स्टेशनचे पोलीस पथके आरोपींच्या शोधात तैनात करण्यात आली आहेत.
पोलीसांनी दिलेली माहिती अशी की, न्यू इंडिया कुरीअर सर्विस कंपनीत काम करणारे कर्मचारी हितेंद्र बाळासाहेब जाधव (वय 29 रा.वाघोशी ता.फलटण जि.सातारा ) हे लातुर ते मुंबई एक दिवसाआड पार्सल पोहच करण्याचे काम करतात,
त्यांना न्यू इंडिया कुरीअर कंपनीचे मालक दशरथ बोबडे यांनी त्यांच्या कुरिअर कंपनीत प्राप्त होणारी रोख रक्कम व मेटल पार्सल लातूर ते मुंबई जाण्यासाठी एसटी चा एक आठवडा पास काढला असल्याने ते सोमवारी (दि. 2 ) सायंकाळी पाच वाजता न्यू इंडिया कुरियर सर्विस कंपनीतून रोख रक्कम आणि एक पार्सल भुलेश्वर पायधुनी मुंबई येथे घेऊन निघाले.
लातुर ते सोलापूर एसटीने सोलापुरपर्यंत आल्यानंतर निलंगा ते भिवंडी एसटी बसमध्ये बसून पुढील प्रवासाला निघाले, गाडीमध्ये गर्दी असल्याने ते मागच्या सीटवर जाऊन बसले ही एसटी बस रात्री एक वाजता पाटस टोल नाका येथे आल्यानंतर एसटीबस मधील कंडक्टरने पाटस आले आहे, येथे कोणी उतरणार आहे का? असे विचारले.
यावेळी एक व्यक्ती चालू बसमधून खाली उतरली. एसटीबस पाटस टोल नका सोडल्यानंतर
दोन ते अडीच किलोमीटर अंतरावर असलेल्या ढमाले वस्तीजवळ आली. बस थांबली. तीन जण एसटीमध्ये चढले. त्यातील एकाने कंडक्टरला विचारले. एस टी मध्ये पास असलेले कोण आहेत का? कंडक्टरने त्यांना मागे बसले आहेत असे सांगितले.
या तीघांनी तुम्ही दोन नंबर धंदा करता, तुमची तक्रार आली होती, तुम्ही आज सापडला असे म्हणून त्यांच्या हातातील फायबरने मारहाण करून खाली उरवले. तसेच माझ्या सोबत
असलेले तेजस धनाजी बोबडे यांचा मोबाईल काढून घेतला होता. तसेच इतर तिघेजणांना खाली उतरून शिवीगाळ करून मारहाण करीत रक्कम ठेवलेली बॅग काढून घेतली व मोबाईल अशी 1 कोटी 12 लाख 36 हजार 860 रूपयांचा ऎवज मारहाण करून काढून घेतला आणि तुम्हाला पोलीस स्टेशनला गेला तर दाखवतो, तुम्ही दोन नंबरचे काम करता अशी धमकी दिली.
आर्मी कलरची बुलेट व गाडीवर दोघेजण पुणेच्या दिशेने व तिसरा पांढऱ्या रंगाच्या स्कुटी सारख्या गाडीवर बसून सोलापूरच्या बाजूने निघून गेले. मात्र ते पोलीस नसल्याचा या प्रवाशांना संशय आल्याने त्यांनी त्यांना पकडण्याचा प्रयत्न केला मात्र ते पसार होण्यास यशस्वी झाले.
याबाबात हितेंद्र जाधव यांनी पाटस पोलीस चौकीत फिर्याद दिल्याने गुन्हा दाखल करण्यात आला आहे. दरम्यान, घटनेची माहिती मिळताच यवत पोलीस स्टेशनचे पोलीस निरीक्षक भाऊसाहेब पाटील, सहाय्यक पोलीस निरीक्षक केशव वाबळे, पोलीस उपनिरीक्षक संजय नागरगोजे यांनी घटनेचे गांभिर्य लक्षात घेवून पुढील कारवाई सुरू केली.
स्थानिक गुन्हे अन्वेषण शाखेचे पोलीस निरीक्षक पद्माकर घनवट यांनी ही पोलीस पथकाच्या टिमसह पाटस येथे धाव घेतली. घटनेची माहिती घेत आरोपींच्या शोधासाठी पोलीसांचे पथकै तैनात केली आहेत. अशी माहिती पोलीसांनी दिली.
