दौंड : महान्यूज लाईव्ह
दौंड तालुक्यातील यवत पोलीस स्टेशनच्या हद्दीत या आठवड्यात घरफोडी, दुकाने फोडून चोरी करण्याच्या घटनांमध्ये वाढ झाली आहे. नाथाचीवाडी येथे घर फोडून दागिन्यांसह रोख रक्कम चोरी झाल्याची घटना ताजी असतानाच आता यवत परिसरात एकाच मालकांची दोन दुकाने फोडून सोने चांदीसह रोख रक्कम असा तब्बल 4 लाख 15 हजारांचा ऎवज चोरून अज्ञात चोरटे लंपास झाल्याची घटना घडली आहे.
यवत पोलीस स्टेशनच्या हद्दीतील पारगाव, नाथाचीवाडी, केडगाव या परिसरात मागील काही दिवासांपासून घरफोडी आणि दुकाने फोडून दागिने आणि रोख रक्कम चोरीच्या घटना घडल्या आहेत. या परिसरात अशा चोरी करण्याचे प्रमाण दिवसेंदिवस वाढत असून चोरट्याची मोठी टोळी वावरत असल्याची शक्यता नागरीक व्यक्त करीत आहेत. या घटनांमुळे परिसरात नागरीकांमध्ये भितीचे वातारवण निर्माण झाले आहे.
गुरूवारी (दि.15 ) रात्री यवत परिसरातील कदमआळी येथील राजेंद्र गणपत मलभारे यांच्या न्यु बालाजी सुपर मार्केट आणि बालाजी सुपर मार्केट किराणा मालाचे दुकानाचे पाठीमागे असलेले लोखंडी ग्रिल गेटचे कुलूप, दुकानाचे दरवाज्याची व बंद खोलीचे दरवाज्याची कडी कोयंडे चोरट्यांनी तोडून बंद खोलीत व दोंन्ही दुकानात प्रवेश करून खोलीतील स्टिल डब्यात असलेले सोन्याचे व चांदीचे दागिने व दुकानाचे काउंटर मधील रोख असा एकुण 4 लाख 15 हजारांचा रोख रक्कम चोरून अज्ञात चोरटे पसार झाले आहेत. याबाबत राजेंद्र मलभारे यांनी यवत पोलीस स्टेशनला फिर्याद दिल्याने चोरीचा गुन्हा दाखल केला आहे.
या घटनेचा पुढील तपास हे सहाय्यक पोलीस निरीक्षक केशव वाबळे हे करीत आहेत. दरम्यान, या घटनेची माहिती मिळताच सासवड उपविभागीय अधिकारी धनंजय पाटील, यवत पोलीस ठाण्याचे पोलीस निरीक्षक भाऊसाहेब पाटील, सहाय्यक पोलीस निरीक्षक केशव वाबळे आदींनी घटनास्थळी भेट देवून पाहणी केली.
