पाहुण्यांचं आगमन गावकऱ्यांसाठी बनतोय डोक्याला ताप..
राजेंद्र झेंडे, दौंड : महान्यूज लाईव्ह रिपोर्ट
इंदापूर, बारामती व दौंड तालुक्याने ६० दिवसांच्या लॉकडाऊनमध्ये कोरोनाला शिस्तबध्दरित्या रोखले खरे, पण पुण्या-मुंबईने कोरोनाला बारामती, इंदापूर व दौंडमध्ये बरोबर पोहचवले..केवळ पुण्या-मुंबईनेच या तीन तालुक्यात तब्बल ५२ कोरोनाग्रस्त दिले. आज बारामती तालुक्यातील लोणीभापकर येथील कोरोनाग्रस्तामुळे ही संख्या ५२ वर पोचली.
मागील पंधरवड्यात दौंड, इंदापूर व बारामती तालुक्यात पुण्या-मुंबईतून सव्वा तीन हजार पाहुणे आले. दौंडमध्ये कोरोनाचे सर्वाधिक रुग्ण आढळले असले तरी ते राज्य राखीव पोलिस दलाचे बहुतांश जवान आहेत. मात्र त्यातही महत्वाची बाब म्हणजे या शूर जवानांना पुण्या-मुंबईतील बंदोबस्तामुळेच कोरोनाची लागण झाली हे नक्की..! त्यामुळेच पुण्या-मुंबईनेच या तीन तालुक्यांना कोरोनाची लागण भेट दिली. दौंड तालुक्यात सर्वाधिक ४१ जणांना झालेली कोरोनाची बाधा ही पुण्या- मुंबईतील संक्रमणामुळेच झाली. बारामती तालुक्यात मुंबई-पुण्यातून आलेल्या ७ जणांना कोरोनाची लागण झाली. तर इंदापूर तालुक्यात मुंबईतून आलेल्या चार जणांना कोरोनाची लागण झाली. थोडक्यात नव्याने कोरोनाची लागण होत असलेले रुग्ण हे पुण्या- मुंबईतून आलेले असल्याने सध्या तिन्ही तालुक्यात पुण्या-मुंबईतून आलेला पाहुणा गावाच्या डोक्याला ताप बनला आहे.
दररोज शासनाची नजर चुकवून शहरातून शेकडो जण मिळेल त्या वाहनाने व दिसेल त्या रस्त्याने आपल्या गावापर्यंत येत आहेत, जिथे फार विरोध होईल, तिथे इन्स्टिट्यूट क्वारंटाईन होत आहेत, तर काही ठिकाणी खमक्या स्थानिक नातेवाईक असेल, तर बिनधास्त घरात राहून गावातही चकाट्या पिटत आहेत. मात्र याचा मनस्ताप गावकऱ्यांना होऊ लागला आहे. आतातर मुंबईहून येणारा बहुतेकदा कोरोनाच्या टप्प्यात जाऊन आलेलाच दिसू लागल्याने मुंबईकरावर मात्र गावकरी जरा जास्तच नजर ठेवून आहेत.
इंदापूरमध्ये शिरसोडी, पोंदकुलवाडी, पळसदेव, बारामतीमध्ये मुर्टी, माळेगाव, वडगाव निंबाळकर, लोणीभापकर, कटफळ तर दौंडमध्ये राज्य राखीव पोलिस दलाचा संपूर्ण गट या कोरोनाने व्यापण्यामागे पुणे- मुंबईकरांचे गावावरचे प्रेम कारणीभूत ठरले आहे.
