राजेंद्र झेंडे : महान्यूज लाईव्ह
दौंड : पुणे शहरात धावणारी पीएमपीमएलची बस ही ग्रामीण भागात सुरू झाल्याने शेतकारी, कामगार, विद्यार्थी प्रवाशांना मोठा दिलासा मिळणार आहे. एकेकाळी एस.टी. महामंडाळाची बस ही ग्रामीण भागातील बस म्हणून ओळखली जायची. पीएमपीमएलनेही ग्रामीण भागात चांगली सेवा दिली, तर ती देखील ग्रामीण भागातील गरीबांची चांगली बस होईल असे मत राज्यमंत्री दत्तात्रय भरणे यांनी व्यक्त केले.
पुणे शहरात सुरू असलेली पुणे महानगर पालिकेची परिवहन महामंडल अर्थात पीएमपीएमएल बस ही हडपसर ते चौफुला आणि हडपसर ते वरवंड अशी धावणार आहे. या बसची सुरवात आज रविवारी ( दि.20 ) राज्यमंत्री दत्तात्रय भरणे यांच्या हस्ते हिरवा झेंडा दाखवून झाली.
याप्रसंगी माजी आमदार व पुणे जिल्हा बॅकेचे अध्यक्ष रमेश थोरात, पुणे महानगर पालिकेची परिवहन महामंडळाचे व्यवस्थापक संचालक डॅा. राजेंद्र जगताप, वाहतुक व्यवस्थापक दत्तात्रय झेंडे, राष्ट्रवादीच्या महिला आघाडीच्या जिल्हाध्यक्ष वैशाली नागवडे, जिल्हा परिषद सदस्य विरधवल जगदाळे, लक्ष्मण सातपुते, दौंड पंचायत समितीच्या सभापती हेमलता फडके, सरपंच मिना दिवेकर, उपसरपंच प्रदीप दिवेकर, नायब तहसीलदार सचिन आखाडे, सार्वजनिक बांधकाम विभागाचे आभियंता हरिचंद्र माळशिकारे आदी उपस्थित होते.
यावेळी राज्यमंत्री दत्तात्रय भरणे म्हणाले की, दौंड तालुक्यात पुणे शहरातील बस सुरू झाल्याने अंत्यत चांगले काम पुणे महानगर पालिकेची परिवहन विभागाने केले आहे. त्यांचे ग्रामीण भागातील प्रवाशी कायमस्वरूपी ऋणी राहतील, पुणे शहराचा ग्रामीण भागात ही मोठ्या प्रमाणात विस्तार होत असून लोकसंख्या व इतर उद्योग वाढत आहे. पुणे शहराला पाण्याची गरज आहेच मात्र यामुळे भविष्यात दौंड आणि इंदापुरला पाणी टंचाई सामना करावा लागणार आहे.
खडकवासला धरणाचे पाणी शेतीसाठी अपुरे पडत आहे. मुळशी धरणाची वीज प्रकल्पाची दुसरीकडे व्यवस्था करून त्या धरणाचे पाणी ही दौंड व इंदापुरला शेतीसाठी मिळाले पाहिजे आणि ती भविष्याची गरज आहे. दौंडसाठी जास्तीत जास्त विकास निधी देण्याचा मी प्रयत्न करीन असे आश्वासन भरणे यांनी यावेळी दिले.
सर्व शासकीय अधिकारी आणि कर्मचारांनी कोरोना काळात चांगले कामकाज केले आहे. कोरोनाची दुसरी लाट थोड्याफार प्रमाणात ओसरली असली, तरी कोरोनाचे संकट संपलेले नाही. जीवाभावाची माणसे आपल्या सोडून गेली आहेत. कोरोनाची तिसरी लाटेची शक्यता आरोग्य विभागाने आणि तंज्ञांनी वर्तवली आहे.यामुळे नागरीकांनी काळजी घ्यावी, शासनाच्या नियमांचे पालन करावे, असे आवाहनही भरणे यांनी यावेळी नागरीकांना केले.
पुणे महानगरपालिका परिवहन महामंडलाचे व्यवस्थापक अध्यक्ष डॅा. राजेंद्र जगताप म्हणाले, पुणे शहरातच पीएमपीमएलची बस सुरू आहे. ग्रामिण भागात ही बस सुरू करण्याची मागणी वाढत आहे. ग्रामिण भागात ही बस सुरू करताना अनेक अडचणी निर्माण झाल्या. मात्र शहरापुरते कार्यक्षेत्र मर्यादित न करता त्याचा विस्तार वाढवा आणि ग्रामीण भागाला जोडण्यासाठी ग्रामीण भागात ही बस सुरू करण्याची गरज ओळखून आम्ही दौंड तालुक्यातील वाघोली ते राहु आणि हडपसर ते यवत अशी बस सुरू केल्या. या बसेसला चांगला प्रतिसाद मिळत आहे.
यावेळी चौफुला आणि वरवंड पर्यंत ही बसेस सुरू करण्याची मागणी ग्रामपंचायत आणि माजी आमदार रमेश थोरात यांनी मागणी केली.
ग्रामीण भागासाठी बारा बस सुरू केल्या आहेत. हडपसर ते चौफुला, वरवंड पर्यंत बस आजपासून सुरू करण्याचा निर्णय घेतला आहे. प्रत्येक अर्धा
तासाला हि बस धावणार आहे. हडपसर ते उरळी (सासवड मार्ग),कात्रज ते विझंर,पिरंगुट ते हिंजवडी,कात्रज ते वडगाव मावळ,हडपसर ते वडकी (गायकवाडी मार्ग) या बसेस आजपासून ( दि.20 ) सुरू करण्यात आल्या असून पुढील टप्यात ग्रामिण भागासाठी काही बसेस सुरू करण्याचे नियोजन आहे. अशी माहिती यावेळी राजेंद्र जगताप यांनी दिली.
रमेश थोरात म्हणाले की, दौड तालुक्यात पीएमपीमएलची बस सुरू व्हावी यासाठी मी स्वतः पीएमपीमएलचीचे अध्यक्ष राजेंद्र जगताप यांची वेळोवेळी भेट घेतली. राहु, यवत आणि आता चौफुला,वरवंड येथे बस सुरू झाली. तालुक्यात अनेक गावांची ही बस सुरू करण्याची मागणी वाढली आहे. पाटस, कुरकुंभ, पारगाव या गावांनी ही बस सुरू करण्यासाठी निवदेने दिली आहेत. या गावांमध्ये ही लवकरच बस सुरू करण्याचा प्रयत्न करू त्यासाठी पाहिजे मदत करू असे आश्वासन थोरात यांनी यावेळी दिले.
