इंदापूर: महान्युज लाईव्ह मुंबईवरून आलेल्या व पोंदकुलवाडी येथे राहत असलेल्या एका कुटुंबातील मायलेकरांना कोरोनाची लागण झाल्याचे स्पष्ट झाले आहे. त्यामुळे इंदापूरातील कोरोनाग्रस्तांची संख्या ५ वर पोचली आहे. विशेष म्हणजे या मुंबईकरांच्या घशातील द्रवाच्या नमुने घेतल्यानंतर त्याचा रिपोर्ट आल्यानंतरही ही मायलेकरे घरीच होती. इंदापूर तालुक्यातील कोरोनाचे रुग्ण वाढण्यास मुंबईकरांनी हातभार लावलेला आहे. बारामती व इंदापूरात सध्या वाढत असलेले रुग्ण हे मुंबईवरून आलेल्या लोकांमुळे वाढत आहेत, त्यात आज एकाची भर पडली. बिजवडी प्राथमिक आरोग्य केंद्राच्या हद्दीत असलेल्या पोंदकुलवाडी येथील मूळ रहिवासी असलेले हे कुटुंब काही दिवसांपूर्वी मुंबईहून येथे आले आहे. तिघे जण या कुटुंबात आहेत. त्यापैकी एक मुलगा निगेटिव्ह आला असून ४२ वर्षीय आई व मुलाचा अहवाल पॉझिटिव्ह आला आहे. त्यांना सध्या कुठलीही लक्षणे दिसत नाहीत, परंतू आरोग्य खात्याने पुण्या-मुंबईहून आलेल्या सर्वांचीच काल (ता.२१) कोरोना चाचणी केली. या चाचणीचे अहवाल आता येऊ लागले आहेत. यामध्ये आज सकाळी महिला रुग्णाचा अहवाल पॉझिटिव्ह आला, त्यामध्ये या चाचणीत ही व्यक्ती कोरोनाबाधित आढळली. त्यानंतर काही वेळाने याच कुटुंबातील मुलाचा अहवाल पॉझिटिव्ह आला. एकाच दिवसात दोघे कोरोनाबाधित आढळल्याने इंदापूरकरांची चिंता वाढली आहे, मात्र त्यातही लक्षणे असलेल्या कोरोनाग्रस्तानंतर आता कोणतीच लक्षणे नसलेल्या कोरोनाग्रस्तांमुळे इंदापूरकरांची चिंता वाढली आहे. मुंबईकर वर्गणीसाठी चांगले, पण रोग घेऊन येणार असतील तर… पुणे- मुंबईकर असलेले गाववाले तसे जत्रा, यात्रांच्या वर्गणीसाठी भले आहेत. त्यांचे त्या काळात गावी येणे गावाला लाभदायक असते. त्यातही काहीजण वर्गणी देत नाहीत, हा भाग अलाहिदा..मात्र जरी वर्गणी देऊन गावावर त्यांचे उपकार होत असले, विकासात त्यांचा वाटा असला तरीदेखील कोरोनाच्या साथीत हे पुणे-मुंबईकर जरा म्हणण्यापेक्षा जास्तच अडचणीचे ठरू लागले आहेत. आधी पुण्या-मुंबईतून येऊन आर्थिक हातभार लावला तर आमच्यावर उपकार होतील असे म्हणणारी गावकरी मंडळी आता पुण्या-मुंबईत असताल तिथेच राहीलात तर आमच्यावर खूप मोठे उपकार होतील असे म्हणू लागले आहेत.
