मुंबई : महान्यूज लाईव्ह
भाजपचे प्रदेशाध्यक्ष चंद्रकांतदादा पाटील यांनी दोन दिवसांपूर्वी पत्रकारांशी बोलताना हे सरकार देखील सारे झोपेत असतानाच पडेल असे सूचक वक्तव्य केले होते, त्यासंदर्भात बारामतीत उपमुख्यमंत्री अजित पवार यांना विचारले असता त्यांनी खोचकपणे पाटील हे त्यावेळी झोपेत बोलत असावेत अशी खिल्ली उडवली, तर दुसरीकडे पाटील यांनी प्रत्युत्तर देताना दादा, मी फाटक्या तोंडाचा, त्यामुळे सांभाळून बोला, मी बोललो तर महागात पडेल असा इशारा दिला.
मराठा आरक्षण, ओबीसी आरक्षण व कोरोनाच्या उपाययोजनांवरून भाजप व महाविकास आघाडीमध्ये जोरदार रस्सीखेच असून भाजप व महाविकास आघाडीच्या नेत्यांदरम्यान दररोज शाब्दीक बाण सुरू आहेत.
दोन दिवसांपूर्वी जलसंपदामंत्री जयंत पाटील यांना पत्रकारांनी चंद्रकांत पाटील या्ंच्या वक्तव्यांसंदर्भात विचारले असता, जयंत पाटील यांनी हजरजबाबीपणे भाजपच्या नेत्यांचा रात्रीवरच भर असतो अशी खिल्ली उडवत चंद्रकांतदादांना स्वप्ने बघायचा छंद आहे अशी मल्लीनाथी केली होती.
त्यानंतर उपमुख्यमंत्री अजितदादा यांनीही चंद्रकांत पाटील त्यावेळी झोपेत होते काय असा सवाल केला होता. त्यावर पाटील या्ंनी लागलीच प्रत्युत्तर देत सांभाळून बोलण्याचा सल्ला अजित पवार यांना दिला.
