खंडाळा : महान्यूज लाईव्ह
खंडाळा तालुक्यातील शिरवळ परिसर आणि वीर धरणावर फिरायला येणाऱ्या पर्यटकांना इंदापूर तालुक्यातील एक तावशी गावातील टोळी सातत्याने लुटत होती. या टोळीला पोलिसांनी जानेवारी महिन्यात बेड्या ठोकल्या होत्या, तर फलटण ग्रामीण च्या हद्दीत देखील लूटमार करणारी माळशिरस तालुक्यातील एक टोळी पोलिसांनी गजाआड केली होती. या दोन्ही टोळ्यांना कोल्हापूर परिक्षेत्राच्या परवानगीने मोक्का लावण्यात आला आहे.
खंडाळा तालुक्यातील शिरवळ परिसरात आणि वीर धरणाच्या परिसरात पर्यटक फिरण्यासाठी येतात त्यातील जोडपी हेरून त्यांची लूट करण्याचा प्रयत्न इंदापूर तालुक्यातील एक टोळी करत होती. या टोळीला जानेवारी महिन्यात शिरवळ पोलिसांनी बेड्या ठोकल्या होत्या या टोळीवर मोक्का लावण्याची शिफारस देखील करण्यात आली होती ती शिफारस कोल्हापूर परिक्षेत्राचे महानिरीक्षक मनोजकुमार लोहिया यांनी मंजूर केले असून आता या टोळीवर मोक्का लावण्यात आला आहे.
शिरवळ पोलिस स्टेशनचे पोलीस निरीक्षक उमेश हजारे, स्थानिक गुन्हे अन्वेषण विभागाचे पोलीस निरीक्षक किशोर धुमाळ यांनी पाठवलेल्या प्रस्तावामध्ये टोळी प्रमुख महावीर सुखदेव खोमणे, सदस्य शाहरूख महमुल्ला बक्षी, अमिर मौलाली मुल्ला, भैय्या हुसेन शेख, मयूर अंकुश कारंडे (सर्व रा. तावशी,ता.इंदापूर, जि.पुणे) याच्यासह एक अल्पवयीन युवकाचा यामध्ये समावेश आहे.
या टोळीने जानेवारी महिन्यात शिरवळ पोलीस ठाण्याच्या हद्दीत वीर धरणावर फिरायला आलेल्या पर्यटकांना लुटून त्यांच्याकडील किंमती ऐवज लुटून नेला होता. शिरवळ पोलीस ठाण्यात याबाबत गुन्हा दाखल झाल्यानंतर वरील सर्व संशयितांना अटक करण्यात आली होती.
त्यांच्यावर सोलापूर, पुणे, सातारा या जिल्ह्यात दरोडा, जबरी चोरी असे विविध पोलीस ठाण्यात गुन्हे दाखल असल्याचे समोर आल्याने शिरवळ पोलिस स्टेशनचे पोलीस निरीक्षक उमेश हजारे यांनी त्यांच्याविरोधात मोक्काचा प्रस्ताव जिल्हा पोलीस अधीक्षक अजयकुमार बन्सल यांच्यामार्फत कोल्हापूर येथील पोलीस महानिरीक्षक यांच्या कार्यालयाकडे पाठवला होता. त्या प्रस्तावाला मनोजकुमार लोहिया यांनी मंजूरी दिली आहे.
तर फलटण ग्रामीण पोलिस स्टेशनचे पोलीस निरीक्षक नितीन सावंत यांनी प्रस्ताव पाठवलेल्या टोळीतील आप्पा उर्फ रवि ज्ञानदेव माने (रा. तामशेतवाडी, ता.माळशिरस,जि.सोलापूर), सदस्य पप्पू उर्फ सुहास किसन सोनवलकर (रा. वडले,ता.फलटण) यांनी सोलापूर, सातारा, उस्मानाबाद, पुणे आणि मुंबईत देखील जबरी चोरी, दरोडा, घातक हत्याराचा धाक दाखवून खंडणी मागणे यासारखे गुन्हे केले होते. हे उघडकीस आल्यानंतर फलटण ग्रामीण पोलिसांनी पोलिसांनी त्यांच्याविरोधात मोक्काचा प्रस्ताव जिल्हा पोलीस अधीक्षक अजयकुमार बन्सल यांच्यामार्फत विशेष पोलीस महानिरीक्षक यांच्या कार्यालयाकडे पाठवला होता. त्या प्रस्तावालाही मनोजकुमार लोहिया यांनी मंजुरी दिली आहे.
या कारवाईसाठी फलटणचे पोलीस उपविभागीय अधिकारी तानाजी बरडे यांच्या मार्गदर्शनाखाली शिरवळ पोलीस स्टेशनचे पोलीस निरीक्षक उमेश हजारे, पोलीस हवालदार वैभव सूर्यवंशी, आप्पासाहेब कोलवडकर व फलटण ग्रामीण पोलिस ठाण्याचे पोलीस निरीक्षक नितीन सावंत, पोलीस उपनिरीक्षक उस्मान शेख, पोलीस हवालदार गणेश वरखडे, राजू फडतरे या अधिकाऱ्यांनी, कर्मचाऱ्यांनी परिश्रम घेतले.
