बारामती : महान्यूज लाईव्ह
गेल्या काही दिवसापासून 45 वर्षाच्या पुढील नागरिकांना लसीकरणासाठी लस उपलब्ध नसल्याने लसीकरण केंद्रे बंद करण्याचे प्रकार घडत आहेत, तर दुसरीकडे 18 ते 45 वयोगटातील युवक व नागरिकांना लसीकरणाची नोंदणी करण्यासाठी कोविन ॲपवरून वेळेत ओटीपी मिळत नाही असे प्रकार घडत आहेत.. आता तर तुम्ही लस नाही घेतली, तरीदेखील तुम्हाला लस घेतल्याचे प्रमाणपत्र मिळाले.. तर मात्र हादरून जाऊ नका!
बारामती तालुक्यातील डोर्लेवाडी येथील प्राथमिक आरोग्य केंद्रात एका ज्येष्ठ नागरिकाने कोरोनाचे लसीकरण करण्यासाठी कोविन ॲप वरून नोंदणी केली. नोंदणी झाली नोंदणी झाल्यानंतर नोंदणी झाल्याचा मेसेज मोबाईल वर आला. सकाळी अकरा ते दुपारी एक या दरम्यान आपण डोर्लेवाडी येथील प्राथमिक आरोग्य केंद्रात जाऊन लसीकरण करून घ्यावे असा संदेश नमूद होता.
हा मेसेज येऊन थोडा वेळ होत नाही आणि हे ज्येष्ठ नागरिक आणि त्यांची पत्नी लसीकरणासाठी दवाखान्याकडे निघत नाहीत, तोच त्यांना तुमचे लसीकरण सकाळी दहा वाजून 35 मिनिटांनी पूर्ण झाले असा मेसेज आला. विशेष म्हणजे याचे प्रमाणपत्र देखील लगेच संबंधित दाम्पत्याच्या मोबाईलवर आले. यामध्ये पाच मे 2021 रोजी बॅच क्रमांक 4120झेड012 या बॅचमधील लस देण्यात आल्याचेही यामध्ये नमूद करण्यात आले होते. तसेच ज्या कर्मचाऱ्यांनी दिली, त्या कर्मचाऱ्यांच्या नावासह हे प्रमाणपत्र संबंधित लाभार्थ्याच्या मोबाईलवर मिळाले.
ज्याची लसच घेतली नाही, त्याचे प्रमाणपत्र थेट मिळाल्याने या दांपत्याला थोडा धक्काच बसला. ते दोघेही चक्रावून गेले. आत्तापर्यंत बोगस मतदानामध्ये आपल्या नावावर कोणीतरी मतदान केले, हे लोकांना माहिती होत होते. त्यानंतर मतदान यंत्रे आली. तरीदेखील कुठेकुठे हा प्रकार घडतो. मात्र तंत्रज्ञानात बदल झाला, म्हणून सरकारी खोड्या कमी झाल्या असे होत नाही ना!
दरम्यान या संदर्भात सणसर येथील माहिती अधिकार कार्यकर्ते राजेंद्र निंबाळकर यांच्यासह संबंधित दांपत्याने देखील या दवाखान्यातील अधिकाऱ्यांना, तसेच तालुका व जिल्हा पातळीवरील काही अधिकाऱ्यांशी चर्चा केली. यामध्ये तांत्रिक दोष असल्याने हे घडले असावे, आमचे येथे लस दिल्याची नोंद नाही, त्यामुळे तुम्ही लस घेण्यासाठी या असा निरोप संबंधित लाभार्थ्याला मिळाल्याचे या लाभार्थ्यांनी ‘महान्यूज’ ला सांगितले.
मात्र सरकारी योजना, मग त्या लाभाच्या असोत की लसीच्या; सगळ्या ठिकाणी सरकारी काम एक सारखेच आहे असाच प्रत्यय यातून आला. गेल्या काही दिवसांपासून लसीकरणामध्ये वशिलेबाजी होत असल्याचा आरोप लोक करत आहेत. तेही एक वेळ ठीक होते, परंतु किमान ज्या लाभार्थ्याने लस घेतलेलीच नाही, त्या ठिकाणी लस मिळाल्याचे प्रमाणपत्र यापुढील काळात तरी कोणाच्या हातात देऊ नये अशीच या दाम्पत्याने अपेक्षा व्यक्त केली.
