मुंबई : महान्यूज लाईव्ह
अखेर राज्य निवडणूक आयोग मेहरबान झाले असून राज्यातील ग्रामपंचायतींच्या सार्वत्रिक निवडणुका जाहीर करण्यात आलेल्या आहेत. जानेवारी 2023 ते डिसेंबर 2023 या कालावधीत मुदत संपलेल्या ग्रामपंचायती व नव्याने स्थापित झालेल्या तसेच 2022 मध्ये चुकीच्या प्रभाग रचना योजना झाल्यामुळे निवडणुका न झालेल्या 2 हजार 359 ग्रामपंचायतींच्या थेट सरपंच पदाच्या निवडणुकांसह या ग्रामपंचायतींच्या निवडणुका जाहीर झाल्या आहेत.
याखेरीज राज्यातील जानेवारी ते डिसेंबर 2023 मध्ये मुदत संपणाऱ्या 2,298 ग्रामपंचायती असून जिथे अन्य कारणामुळे सरपंच पदाच्या जागा व सदस्य जिथे रिक्त झालेल्या आहेत, अशा 2068 ग्रामपंचायतीमधील एकूण 2950 सदस्य व 130 सरपंच पदांच्या जागा 3,080 गावांमध्ये रिक्त आहेत. या रिक्त जागांच्या गावांसह एकूणच 5 हजार गावांमध्ये 5 नोव्हेंबर 2023 रोजी मतदान होणार आहे.
यासाठी 25 ऑगस्ट 2023 रोजी अंतिम यादी अंतिम मतदार यादी प्रसिद्ध करण्यात आली आहे, तर आरक्षणाची प्रक्रिया पूर्ण केलेल्या 63 ग्रामपंचायतींची यादी 27 सप्टेंबर 2023 रोजी अंतिम मतदार यादी प्रसिद्ध करण्यात आली आहे. अशा राज्यातील सुमारे 2359 ग्रामपंचायतींसाठी सदस्य व सरपंच पदाच्या सार्वत्रिक निवडणुका घेण्याचा आदेश राज्य निवडणूक आयोगाने जाहीर केला आहे.
या निवडणुकीसंदर्भात सर्वोच्च न्यायालयात विशेष अधिकार दाखल आहे, या याचिकेमध्ये होणाऱ्या निर्णयानुसार या निवडणुकांचा पुढील प्रवास असणार आहे, असेही राज्य निवडणूक आयोगाने स्पष्ट केले आहे. या निर्णयानुसार उमेदवारी अर्ज दाखल करण्याचा अंतिम दिवस 31 डिसेंबर 2023 अथवा त्यापूर्वीचा राहणार असून जात पडताळणी व प्रमाणपत्र पडताळणी निवडून आल्याच्या दिवसापासून बारा महिन्याच्या आत सादर करावे लागणार आहे असे हमीपत्र उमेदवारांना सादर करण्याची मुभा यामध्ये देण्यात आली आहे.
या निवडणूक कार्यक्रमानुसार मतदानाची वेळ ही सकाळी साडेसात ते संध्याकाळी साडेपाच पर्यंत असणार असून, गडचिरोली व गोंदिया यासारख्या दुर्गम व नक्षलग्रस्त भागांमध्ये, मात्र सकाळी साडेसात ते दुपारी तीन वाजेपर्यंत राहणार आहे.
या नव्या आदेशानुसार तहसीलदार यांनी सहा ऑक्टोबर 2023 रोजी निवडणुकीचा नोटीस प्रसिद्ध करावयाची असून उमेदवारी अर्ज सादर करण्याची मुदत 16 ऑक्टोबर ते 20 ऑक्टोबर 2023 अशी राहणार आहे उमेदवारी अर्ज छाननी करण्याचा दिनांक 23 ऑक्टोबर 2023 असून उमेदवारी अर्ज मागे घेण्याचा अंतिम दिवस 25 ऑक्टोबर 2023 आहे निवडणूक चिन्ह निवडून देण्याचा तसेच अंतिम निवडणूक लढवणाऱ्या उमेदवारांची यादी प्रसिद्ध करण्याची मुदत 25 ऑक्टोबर 2023 असून पाच नोव्हेंबर 2023 रोजी मतदान होणार आहे 6 नोव्हेंबर 2023 रोजी मतमोजणी होणार आहे.
