पुणे : महान्यूज लाईव्ह
जिल्हा नियोजन समितीच्या बैठकीत आज पुणे जिल्ह्यासाठी सर्वसाधारण जिल्हा वार्षिक योजनेंतर्गत २०२२-२३ची बैठक पार पडली.या बैठकीत जिल्ह्याच्या विकासासाठी तब्बल ६१९ कोटी १० लाख रुपयांची तरतूद करण्यात आली आहे. तशी घोषणाही राज्याचे उपमुख्यमंत्री आणि पुणे जिल्ह्याचे पालकमंत्री अजित पवार यांनी केली आहे.
अनुसूचित जाती योजनेंतर्गत १२८ कोटी ९३ लक्ष रु. व आदिवासी उपयोजनेंतर्गत ४५ कोटी ८३ लक्ष रु. अशा एकूण ७९३ कोटी ८६ लक्ष रु. प्रारुप आराखड्यास मान्यता देण्यात आली. सर्वसाधारण योजनेअंतर्गत कृषि व संलग्न सेवेसाठी ५४ कोटी १८ लक्ष, ग्रामीण विकास ८० कोटी,पाटबंधारे व पूर नियंत्रण ३३ कोटी ६ लक्ष, ऊर्जाविकास ५१ कोटी १९ लक्ष, उद्योग व खाणकाम १ कोटी १७ लक्ष,परिवहन ११३ कोटी, सामान्य आर्थिक सेवा १६ कोटी २८ लक्ष रुपयांचा नियतव्यय प्रस्तावित करण्यात आला आहे.
याशिवाय सामाजिक सामुहिक सेवा २१० कोटी ५६ लक्ष, सामान्य सेवा २८ कोटी ६९ लक्ष आणि नाविन्यपूर्ण योजनेसाठी ३० कोटी ९५ लक्ष रुपयांचा नियतव्यय देखील प्रस्तावित करण्यात आला आहे. अनुसूचित जाती योजनेअंतर्गत कृषि व संलग्न सेवेसाठी ४ कोटी ४० लक्ष, ऊर्जा विकास ७ कोटी, उद्योग व खाणकाम ३४ लक्ष, परिवहन ३० कोटी, सामाजिक सामुहिक सेवा ८३ कोटी ३१ लक्ष आणि नाविन्यपूर्ण योजनेसाठी ३ कोटी ८६ लक्ष रुपयांचा नियतव्यय प्रस्तावित करण्यात आला आहे.
आदिवासी उपयोजनेअंतर्गत कृषि व संलग्न सेवेसाठी ६ कोटी २७ लक्ष, ग्रामीण विकास ४ कोटी ८५ लक्ष, पाटबंधारे व पूर नियंत्रण ३ कोटी ४० लक्ष, ऊर्जा विकास २ कोटी ९६ लक्ष, उद्योग व खाणकाम ३ लक्ष रुपयांचा नियतव्यय प्रस्तावित करण्यात आला आहे. यासोबत परिवहन ६ कोटी ४२ लक्ष, सामाजिक सामुहिक सेवा २० कोटी ७५ लक्ष आणि नाविन्यपूर्ण योजनेसाठी १ कोटी १५ लक्ष रुपयांचा नियतव्यय सुद्धा प्रस्तावित करण्यात आला आहे.
त्याचप्रमाणे डोंगरी विकास कार्यक्रमांतर्गत जिल्ह्यातील ९ तालुक्यांसाठी प्रस्तावित कामांना मंजूरी देण्यात आली. सर्वसाधारण योजनेअंतर्गत २०२१-२२ या वर्षात २८६ कोटी ८ लक्ष (४१.१६ टक्के), अनुसूचित जाती योजनेअंतर्गत २५ कोटी ८९ लक्ष (२०.०८ टक्के) आणि आदिवासी उपयोजनेअंतर्गत ६ कोटी ९३ लक्ष (१५.६१ टक्के) निधी खर्च झाला आहे.
मार्च अखेर १०० टक्के निधी खर्च करण्याचे नियेाजन करण्यात आले आहे. पुणे जिल्ह्यातील जलजीवन कामांचे सर्वेक्षण वेगाने करून या कामांना गती देण्याच्या सूचना दिल्या. पर्यटन विकासांतर्गत अष्टविनायक पर्यटन विकासासाठी राज्यस्तरावरून देखील प्रयत्न करण्यात येत असून पर्यटकांना सुविधा होईल आणि पर्यटक आकर्षित होतील, असं काम होणं अपेक्षित आहे.
