इंदापुर : महान्यूज लाईव्ह
उजनी मच्छिमार बचाव अभियानाच्या आंदोलनाची दखल घेत अखेर उजनी जलशायतील ईओआय अर्थात संभाव्य मासेमारी ठेकेदारी पद्घत रद्द करण्यात आल्याची घोषणा आज मंत्रालय मुंबईत जलसपदा (गोदावरी व कष्णा खोरे विकास महामंडळ) मंत्री राधाकृष्ण विखे पाटील यांनी केली.यावेळी कृषिमंत्री दत्तात्रय भरणे उपस्थित होते.तर माजी मंत्री हर्षवर्धन पाटील व्हीसी वर उपस्थित होते.या निर्णयामुळे उजनीतील मच्छिमारांवरील ठेकेदारीचे संकट टळले तर दुसऱ्या बाजुने ठेका घेणाऱ्या भांडवलदार कंपन्यांचे स्वप्न धुळीस मिळाले.
कृष्णा खोरे विकास महामंडळाने उजनीतील मासेमारी व त्यावर अवलंबून असणाऱ्या व्यवसायासाठी स्वारस्य अभिव्यक्ती प्रणालीचा अवलंब केला होता.त्यामुळे मच्छिमार व त्यासंबंधीचे व्यावसायिक अडचणीत आले होते.यावरून या प्रक्रिये विरोधात सातत्याने जन आंदोलने उभारण्यात येत होती. अखेर आजच्या या बैठकीत ही ईओआय प्रणाली रद्द करण्यात आल्याने मच्छिमारांनी एकाच जल्लोष केला.
संभाव्य ठेकेदारी पद्घत बंद करण्यासाठी भोई मच्छिमार ,लोकशासन आंदोलन व इतर मच्छिमार संघटनांच्या वतीने गेली दोन अडीच महिन्यांपासून आंदोलने सुरू होती. गावोगावच्या एक दिवसीय लाक्षणिक उपोषण व पुण्यातील प्राणांतिक उपोषण आणि कृष्णा खोरे विकास महा मंडळाच्या एमडी यांच्या समोर संतप्त आंदोलकांनी बांगडया फोडल्यानंतर ठेका रद्द ची प्रक्रियेने वेग घेतला होता.
आज दि.५ रोजी मंत्रालयात राधाकृष्ण विखे पाटील, दत्तात्रय भरणे यांनी मच्छिमार प्रतिनिधींची बैठक आयोजित केली होती यामध्ये काही क्षणातच विखे पाटील यांनी ईओआय प्रणाली रद्द करण्यात येत असल्याचे जाहीर केले. यावेळी हर्षवर्धन पाटील यांनीही ठेका रद्दला पाठींबा दिला. उजनी जलाशयातील मासेमारी बाबत कृष्णा खोरे विकास महामंडळाने स्वारस्य अभिव्यक्ती ही प्रणालीचा अवलंब केला होता.त्यामुळे हा व्यवसाय भांडवलदारांच्या हातात जाणार आणि पूर्वीप्रमाणे अन्यायाला सामोरे जाण्याची भीती व्यक्त केली जात होती.
उजनीतील या व्यवसायावर पारंपरिक मच्छिमार तसेच भूमिहीन, पारधी,मागासवर्गीय, मुस्लिम कुटुंबाचा उदरनिर्वाह व रोजगार अवलंबून आहे मात्र हा रोजगार हिरावणारा व मच्छिमार तसेच व्यापारी,आडतदार,हॉटेल व्यावसायिक,जाळी दुकानदार,बर्फ कारखानदार, तोडाई, कामगार यांना देखील अडचणी येणार होत्या. यावरून मच्छिमार बचाव अभियानाच्या वतीने उजनी काठच्या प्रत्येक गावात एक दिवसीय लाक्षणिक उपोषण व पुण्यातील प्राणांतिक उपोषण आणि जलसंपदा विभागाच्या एमडी यांच्या टेबलावर फोडलेल्या बांगड्या मुळे आंदोलन लक्षवेधी ठरले होते.
भिगवण व इंदापुर मासळी बाजार बंद ठेवले होते. अखेर या लढ्याला यश आल्याने उजनीतील मच्छिमारांनी आनंद व्यक्त केला आहे. मच्छिमार बचाव अभियानाच्या वतीने चंद्रकांत भोई, दत्तात्रय व्यवहारे,उज्वला परदेशी,बाळासाहेब काळे,संजय दरदरे ,बाळासाहेब गाडेकर, अनिल नगरे, बापुराव भोई, विक्रम शेलार, अनिता नगरे, युवराज नगरे,बलभीम भोई, अमोल पतुरे, पोपट नगरे, भारत भोई,लतीफ काळे, अमजद शेख आदींच्या नेतृत्वाखाली हे आंदोलने सुरू होती.
