बारामती : श्री सोमेश्वर सहकारी साखर कारखान्याच्या पंचवार्षिक निवडणुकीच्या रणधुमाळीत एक मोठी राजकीय घडामोड समोर आली आहे. भाजपसोबत जात स्वतंत्र पॅनल उभे करणारे पॅनल प्रमुख पुरुषोत्तम जगताप यांना निवडणूक निर्णय अधिकाऱ्यांनी जोरदार झटका दिला असून, निवडणुकीच्या प्रचारात उपमुख्यमंत्री अजित पवार यांचे नाव आणि प्रतिमा वापरण्यास स्पष्टपणे निर्बंध घातले आहेत.
विरोधकांकडून प्रचार साहित्यामध्ये अजित पवार यांच्या नावाचा आणि प्रतिमेचा बेकायदेशीरपणे वापर केला जात असल्याचा गंभीर आरोप करत जय पवार यांनी आक्रमक भूमिका घेत निवडणूक आयोगाकडे धाव घेतली होती. यापूर्वी निवडणूक अधिकाऱ्यांनी तोंडी आणि दूरध्वनीवरून समज देऊनही, प्रचाराचे फ्लेक्स, बॅनर्स, स्टिकर्स आणि डिजिटल माध्यमांवर अजितदादांच्या फोटोचा वापर सुरूच ठेवल्याचे निदर्शनास आले होते.
जय पवारांच्या या तक्रारीची गंभीर दखल घेत निवडणूक निर्णय अधिकारी दिग्विजय आहेर यांनी तात्काळ सर्व डिजिटल तसेच छापील प्रचार साहित्य हटवून त्याबाबतचा अहवाल सादर करण्याचे कडक आदेश दिले आहेत. या आदेशाचे तात्काळ पालन न झाल्यास आचारसंहितेचा थेट भंग मानून संबंधितांवर कायदेशीर व फौजदारी कारवाई केली जाईल, असा सज्जड इशाराही निवडणूक प्रशासनाने दिला आहे.
अजितदादा तर महापुरुषांच्या श्रेणीत.. मग असं का?
निवडणूक निर्णय अधिकाऱ्यांच्या या कठोर भूमिकेमुळे सोमेश्वर कारखान्याच्या राजकीय वर्तुळात एकच खळबळ उडाली असून, आता या कारवाईवर पुरुषोत्तम जगताप नेमकी काय भूमिका मांडतात याकडे सर्वांचे लक्ष लागले आहे. दरम्यान जगताप यांच्या समर्थकांनी काल अशा पद्धतीने मत व्यक्त केले होते की, आता अजितदादा हे महापुरुषांच्या श्रेणीत आहेत. अशावेळी त्यांचे फोटो किंवा छायाचित्र वापरण्यावर बंधन का? अर्थात पुरुषोत्तम जगताप यांनी अजितदादा आमच्या हृदयात आहेत असे आधीच सांगितले आहे. त्यामुळे पुढील काय तो निर्णय होईल!
