निरा : पुरंदर तालुक्यातील निरा शहरातील गजबजलेल्या लक्ष्मी रोड परिसरात मध्यरात्रीच्या सुमारास लागलेल्या भीषण आगीत ‘शू पॅलेस’ हे पादत्राणांचे दुकान पूर्णपणे जळून खाक झाले. गौरी जनरल स्टोअरच्या वरील मजल्यावर असलेल्या या दुकानाला अचानक लागलेल्या आगीत दुकानातील सर्व माल जळून भस्मसात झाल्याने व्यावसायिकाचे लाखो रुपयांचे आर्थिक नुकसान झाले आहे.
मध्यरात्री लागलेल्या या आगीने काही वेळातच रौद्ररूप धारण केले. दुकानात मोठ्या प्रमाणावर शूज, चपला व रबर-प्लॅस्टिकचे साहित्य असल्याने आगीच्या प्रचंड ज्वाला आणि धुराचे लोट परिसरात पसरले. आगीची माहिती मिळताच स्थानिक नागरिकांनी घटनास्थळी धाव घेत मदतकार्य सुरू केले. तातडीने अग्निशमन दलाला पाचारण करण्यात आले असून जवानांनी अथक प्रयत्नांनंतर आगीवर नियंत्रण मिळवले.
या दुर्घटनेत दुकानातील संपूर्ण साहित्याची राखरांगोळी झाली असून नेमका नुकसानीचा आकडा समजू शकलेला नाही. आगीचे नेमके कारण अद्याप स्पष्ट झालेले नसले तरी शॉर्टसर्किटमुळे ही आग लागल्याचा प्राथमिक संशय व्यक्त केला जात आहे. मध्यरात्रीच्या वेळी ही घटना घडल्याने सुदैवाने कोणतीही जीवितहानी झाली नाही, मात्र ऐन गर्दीच्या बाजारपेठेत घडलेल्या या दुर्घटनेमुळे व्यापारी वर्गात मोठी खळबळ उडाली आहे.
