बारामती : महान्यूज लाईव्ह
थकीत व्यावसायिक रकमेपोटी दिलेला ८८ लाख ५९ हजार ९०३ रुपयांचा चेक न वटल्याप्रकरणी दाखल फौजदारी खटल्यात पुण्यातील येथील वरिष्ठ स्तर व प्रमुख न्यायदंडाधिकारी आनंद एस. मुंढे यांनी आरोपीला तीन महिने कारावासाची शिक्षा सुनावली. तसेच, फिर्यादीस ९७ लाख रुपये नुकसानभरपाई देण्याचे आदेश दिले. हा निकाल २१ सप्टेंबर २०२६ रोजी देण्यात आला.
स्पंदन मेडिकेअरचा संचालक जगदीश बाजीराव कदम (रा. समर्थनगर, नवी सांगवी, पुणे) असे शिक्षा झालेल्या आरोपीचे नाव आहे. युनायटेड मेडिकल सोल्यूशन कंपनीतर्फे जयदीप दत्ताराम कुंभार (रा. वारजे, पुणे) यांनी ही खासगी फौजदारी तक्रार दाखल केली होती. फिर्यादीची वैद्यकीय व्यवसायासाठी आवश्यक मशिनरी पुरविणारी फर्म असून, आरोपीने वेळोवेळी या फर्मकडून मशिनरी खरेदी केली होती. या व्यवहारातील थकीत रकमेच्या परतफेडीसाठी आरोपीने ८८ लाख ५९ हजार ९०३ रुपयांचा धनादेश दिला. मात्र, बँकेत जमा केल्यानंतर सदर धनादेश न वटता परत आला.
धनादेश अनादरानंतर फिर्यादीने अॅड. विशाल विजयकुमार बर्गे आणि अॅड. युवराज जाधव (रा. बारामती) यांच्यामार्फत न्यायालयात फौजदारी खटला दाखल केला. सुनावणीदरम्यान आरोपीने संबंधित रक्कम यापूर्वीच परत केल्याचा, तसेच पैसे उकळण्याच्या उद्देशाने खोटा खटला दाखल करण्यात आल्याचा बचाव घेतला.
त्यावर फिर्यादीतर्फे अॅड. विशाल बर्गे यांनी युक्तिवाद करताना चेकचा गैरवापर होण्याची भीती असल्यास आरोपीने पोलिसांत तक्रार करणे किंवा बँकेला ‘स्टॉप पेमेंट’च्या सूचना देणे अपेक्षित होते, असे न्यायालयाच्या निदर्शनास आणून दिले. तसेच, वकिलांच्या नोटिशीला तत्काळ उत्तर देऊन आपली बाजू मांडण्यात आली नसल्याचा आणि आरोपीने चेकवरील स्वाक्षरी नाकारली नसल्याचा मुद्दाही त्यांनी मांडला.
फिर्यादीतर्फे करण्यात आलेल्या युक्तिवादाच्या समर्थनार्थ सर्वोच्च न्यायालयाचे विविध निकाल न्यायालयासमोर सादर करण्यात आले. अॅड. विशाल बर्गे आणि अॅड. युवराज जाधव यांनी केलेला युक्तिवाद ग्राह्य धरत न्यायालयाने आरोपीला तीन महिने कारावासाची शिक्षा सुनावली. याशिवाय, फिर्यादीस ९७ लाख रुपये नुकसानभरपाई देण्याचा आदेशही न्यायालयाने दिला.
