दौंड : महान्यूज लाईव्ह
दौंड शहरातील भीमनगर परिसरात भीमा नदीकाठालगत असलेल्या खासगी शेतजमिनीतून रात्रीच्या अंधाराचा फायदा घेत जेसीबीच्या सहाय्याने बेकायदेशीरपणे मातीचा उपसा करून वाहतूक केली जात असल्याचा प्रकार समोर आला आहे. या प्रकारामुळे शेतजमिनीचे नुकसान होत असल्याचा आरोप संबंधित शेतकऱ्यांनी केला असून, महसूल व पोलीस प्रशासनाच्या कारवाईबाबतही प्रश्न उपस्थित केले आहेत.
दौंड शहर हद्दीतील भीमनगर येथील शेतजमिनीतून रात्रीच्या वेळी मातीचा उपसा केला जात असल्याचे शेतकऱ्यांचे म्हणणे आहे. जेसीबीच्या सहाय्याने जमीन खोदून माती काढल्यानंतर ती हायवा वाहनांमधून अन्यत्र नेली जात असल्याचा आरोप करण्यात आला आहे. या प्रकारामुळे शेतजमिनीचा पोत आणि भविष्यातील शेतीच्या उत्पादनक्षमतेवर परिणाम होण्याची भीती शेतकऱ्यांनी व्यक्त केली आहे.
या प्रकरणी नुकसानग्रस्त शेतकरी सुधीर भीमा सोनवणे आणि अजय अर्जुन सोनवणे यांनी दौंड तहसीलदार तसेच दौंड पोलीस ठाण्यात लेखी तक्रारी दाखल केल्या आहेत. तक्रारी करूनही संबंधितांवर अद्याप ठोस कारवाई झालेली नसल्याचा आरोप शेतकऱ्यांनी केला आहे. तसेच स्थानिक महसूल यंत्रणेतील काही अधिकाऱ्यांच्या संगनमतामुळे हा प्रकार सुरू असल्याचा गंभीर आरोपही त्यांनी केला असून, या आरोपांची प्रशासनाने चौकशी करण्याची मागणी केली आहे.
दरम्यान, रात्रीच्या वेळी मातीने भरलेली हायवा वाहने दौंड शहरातून वाहतूक करत असताना हा प्रकार प्रशासनाच्या निदर्शनास का आला नाही, असा सवालही शेतकऱ्यांकडून उपस्थित करण्यात येत आहे. माती उपशासाठी आवश्यक परवानग्या, महसूल नियमांचे पालन आणि वाहतुकीबाबतच्या नियमांची तपासणी करून संबंधितांवर कारवाई करावी, अशी मागणी करण्यात आली आहे.
शेतकऱ्यांच्या तक्रारीची गांभीर्याने दखल घेऊन माती उपशाच्या ठिकाणी प्रत्यक्ष पाहणी करावी, पंचनामा करावा आणि नियमांचे उल्लंघन आढळल्यास संबंधितांविरुद्ध गुन्हे दाखल करून कठोर कारवाई करावी, अशी मागणी सुधीर सोनवणे आणि अजय सोनवणे यांनी केली आहे. कारवाई न झाल्यास आंदोलन करण्याचा इशाराही त्यांनी दिला आहे.
दरम्यान, या प्रकरणाबाबत दौंडचे तहसीलदार अरुण शेलार यांच्याशी संपर्क साधला असता, “याबाबत तलाठी आणि मंडलाधिकाऱ्यांना घटनास्थळी जाऊन पंचनामा करून तात्काळ कारवाई करण्याचे आदेश दिले आहेत,” अशी माहिती त्यांनी दिली.
