पुणे : महान्यूज लाईव्ह
जुन्नर तालुक्यातील बोरी बुद्रुक येथील स्मशानभूमीत दशक्रिया विधीसाठी गेलेल्या ग्रामस्थांना अनोख्या पद्धतीने ठेवण्यात आलेले साहित्य आढळल्याने गावात चर्चेला उधाण आले आहे. लाल कपड्यात बांधलेल्या मडक्यात दोन काळ्या बाहुल्या, एका पुरुषाचा आणि एका महिलेचा फोटो तसेच हळद-कुंकू व बुका आढळल्याचे ग्रामस्थांनी सांगितले.
आज सकाळी दशक्रिया विधीसाठी काही ग्रामस्थ स्मशानभूमीत गेले असता त्यांचे लक्ष एका ठिकाणी ठेवलेल्या या मडक्याकडे गेले. उत्सुकतेपोटी पाहणी केली असता मडक्यातील साहित्य समोर आले. छायाचित्रांवर हळद-कुंकू व बुका लावलेला असून, त्यावर टाचण्या टोचल्याचेही दिसून आल्याचे ग्रामस्थांनी सांगितले.
मडक्यात आढळलेली दोन्ही छायाचित्रे स्थानिक व्यक्तींची नसल्याचे ग्रामस्थांचे म्हणणे आहे. त्यामुळे हे साहित्य स्मशानभूमीत कोणी आणून ठेवले आणि त्यामागील नेमका उद्देश काय, याबाबत प्रश्न उपस्थित झाले आहेत.
दरम्यान, या प्रकाराची माहिती समोर आल्यानंतर नागरिकांमध्ये काही काळ संभ्रमाचे वातावरण निर्माण झाले. सदर प्रकारामागे अंधश्रद्धेचा संबंध आहे की अन्य कोणते कारण, याबाबत सध्या कोणतीही अधिकृत माहिती उपलब्ध नाही. त्यामुळे या घटनेबाबत अफवा न पसरवता संबंधित यंत्रणेने पाहणी करून वस्तुस्थिती स्पष्ट करावी, अशी अपेक्षा ग्रामस्थांकडून व्यक्त होत आहे.
