बारामती, दि. 27 : बारामती तालुक्यातील लोणी भापकर (बोरघाट) परिसरात पूर्ववैमनस्यातून एका तरुणावर कोयत्याने जीवघेणा हल्ला करून खूनाचा प्रयत्न केल्याची गंभीर घटना समोर आली आहे. या प्रकरणी वडगाव निंबाळकर पोलीस ठाण्यात चौघांविरुद्ध भारतीय न्याय संहिता, अनुसूचित जाती-जमाती (अत्याचार प्रतिबंध) अधिनियम तसेच शस्त्र अधिनियमांतर्गत गुन्हा दाखल करण्यात आला आहे.
पोलीसांनी दिलेल्या माहितीनुसार, प्रथमेश उर्फ सोन्या जालींदर कांबळे (वय 28, रा. लोणी भापकर, ता. बारामती) यांनी दिलेल्या फिर्यादीवरून हा गुन्हा नोंदविण्यात आला आहे. दि. 27 एप्रिल 2026 रोजी दुपारी सुमारे 12.15 वाजता लोणी भापकर येथील बोरघाट परिसरातील एका पोल्ट्री फार्मजवळ ही घटना घडली.
फिर्यादीनुसार, आरोपींनी लोखंडी कोयत्याने प्रथमेश कांबळे यांच्या मान व डोक्यावर वार करून त्यांचा खून करण्याचा प्रयत्न केला. प्राथमिक तपासात फिर्यादी व आरोपी यांच्यातील पूर्ववैमनस्य हे या हल्ल्यामागील कारण असल्याचे समोर आले असून, पोलिसांकडून या दिशेने सखोल तपास सुरू आहे. या प्रकरणी अभिषेक तात्या पवार, प्रथमेश जालींदर खोमणे, महेश गणपत भापकर आणि ओंकार उर्फ सोनू राजेश आरडे (सर्व रा. लोणी भापकर, ता. बारामती, जि. पुणे) यांच्याविरुद्ध गुन्हा दाखल करण्यात आला आहे.
वडगाव निंबाळकर पोलीस ठाण्यात गुन्हा रजिस्टर क्रमांक 149/2026 अंतर्गत भारतीय न्याय संहिता कलम 109, 61(2), 352, 351(2), 3(5), अनुसूचित जाती-जमाती (अत्याचार प्रतिबंध) अधिनियमातील कलम 3(2)(V), 3(2)(VA), 6 तसेच शस्त्र अधिनियम कलम 4 व 25 अन्वये गुन्हा नोंद करण्यात आला आहे.
या गुन्ह्याचा पुढील तपास उपविभागीय पोलीस अधिकारी चैतन्य कदम करीत असून, आरोपींचा शोध घेण्याचे काम आणि अन्य तपासाची कार्यवाही सुरू असल्याची माहिती पोलिसांनी दिली.
