दौंड : महान्यूज लाईव्ह
कुरकुंभ MIDC परिसरात बिनपरवानगीने धोकादायक रसायनाची वाहतूक करणाऱ्या टाटा ट्रक चालकाविरुद्ध दौंड पोलिसांनी गुन्हा दाखल केला आहे. पर्यावरण आणि मानवी आरोग्यास धोका निर्माण होईल, अशा प्रकारे वाहतूक केल्याचा आरोप आहे. प्रकाश महाद साळवे, (वय 43 रा. गजानन सोसायटी, दौंड ) या वाहनचालकावर गुन्हा दाखल करण्यात आला असून
मंगळवारी (दि 30 ) सायंकाळी 4.30 वाजण्याच्या सुमारास
कुरकुंभ MIDC, मधुमालती इंडस्ट्रीजसमोरील रस्त्यावर ही कारवाई करण्यात आली. याबाबत पोलिसांनी दिलेली माहिती अशी की, कुरकुंभ MIDC परिसरात पेट्रोलिंग करणाऱ्या पोलीस पथकाला टाटा ट्रक( क्र. (MH-12-HD-5106) संशयास्पदरित्या आढळला. वाहन थांबवून तपासणी केली असता, त्यात रासायनिक टाक्या होत्या. चालक प्रकाश साळवे याने सांगितले की, टाक्यांमध्ये Mix Solvent आहे आणि ते TRIMURTI PHARMA, कुरकुंभ MIDC येथून बाहेर आणले आहे.
मात्र, धोकादायक रसायन वाहतुकीसाठी आवश्यक असलेली महाराष्ट्र प्रदूषण नियंत्रण मंडळाची MPCB परवानगी, वाहतूक कागदपत्रे किंवा इतर कोणतीही वैध कागदपत्रे त्याच्याकडे नव्हती. तसेच केंद्रीय मोटार वाहन नियमांनुसार आवश्यक सुरक्षा उपाय न करता वाहतूक केल्याचे आढळून आले.याप्रकरणी दौंड पोलीस ठाण्याचे पोलीस शिपाई अंकुश दळवी यांनी दिलेल्या फिर्यादीवरून आरोपी वाहन चालक प्रकाश साळवे याच्याविरुद्ध दौंड पोलीस ठाण्यात गुन्हा दाखल करण्यात आला आहे.
त्याच्यावर मोटार वाहन कायदा, केंद्रीय मोटार वाहन नियम आणि पर्यावरण संरक्षण कायद्यानुसार कारवाई करण्यात आली आहे. धोकादायक रसायनांची बेकायदेशीर वाहतूक हा मोठा धोका असल्याने MIDC परिसरात अशा वाहनांवर कडक लक्ष ठेवले जात आहे, असे पोलिसांनी सांगितले.
