शिरूर, दि. १० : शिरूर तालुक्यातील वरूडे गावात घराबाहेर ओट्यावर झोपलेल्या एका इसमाचा धारदार कोयत्याने गळा चिरून निर्घृण खून करण्यात आल्याची धक्कादायक घटना उघडकीस आली आहे. या खुनामुळे संपूर्ण परिसरात भीती व दहशतीचे वातावरण निर्माण झाले होते. मात्र शिक्रापूर पोलीस आणि पुणे ग्रामीण स्थानिक गुन्हे शाखेने तपासाची चक्रे वेगाने फिरवत अवघ्या ३६ तासांत गुन्ह्याचा छडा लावत आरोपी अल्पवयीन मुलाला ताब्यात घेतले आहे.
मिळालेल्या माहितीनुसार, वरूडे येथील रानमळा परिसरात राहणारे बाळासाहेब बबन तांबे (वय ४३) हे उकाड्यामुळे ८ जून रोजी रात्री घराबाहेरील ओट्यावर झोपले होते. पहाटेच्या सुमारास अज्ञात व्यक्तीने त्यांच्या गळ्यावर धारदार कोयत्याने सपासप वार केले. या हल्ल्यात त्यांचा जागीच मृत्यू झाला. सकाळी रक्ताच्या थारोळ्यात पडलेला मृतदेह आढळून आल्यानंतर गावात एकच खळबळ उडाली.
घटनेची माहिती मिळताच शिक्रापूर पोलिसांनी घटनास्थळी धाव घेत पंचनामा करून तपास सुरू केला. खुनामागील कारण आणि आरोपीचा कोणताही स्पष्ट मागमूस नसल्याने पोलिसांसमोर मोठे आव्हान होते. मात्र तपास पथकाने मयताच्या हालचाली, पूर्वीचे वाद, गावातील सामाजिक संबंध तसेच संशयित व्यक्तींची माहिती बारकाईने तपासली.
तपासादरम्यान पोलिसांना गावातीलच एका अल्पवयीन मुलाबाबत संशय आला. त्यानंतर संबंधित मुलाची पालकांच्या उपस्थितीत सखोल चौकशी करण्यात आली. चौकशीदरम्यान त्याने खुनाची धक्कादायक कबुली दिली. पोलिसांच्या तपासात उघड झालेल्या माहितीनुसार, सुमारे दोन वर्षांपूर्वी मयत बाळासाहेब तांबे आणि आरोपी यांच्यात वाद झाला होता.
त्याचबरोबर काही दिवसांपूर्वी झालेल्या शिवीगाळ आणि धमकीच्या घटनेमुळे आरोपीच्या मनात तीव्र संताप निर्माण झाला होता. याच रागातून सूड उगवण्याचा निर्धार करून त्याने खुनाचा कट रचला. तांबे हे घराबाहेर झोपल्याची संधी साधत आरोपीने मध्यरात्री त्यांच्या गळ्यावर कोयत्याने वार केले आणि घटनास्थळावरून पसार झाला.
पोलिसांनी आरोपीकडून खुनासाठी वापरण्यात आलेला लोखंडी कोयता जप्त केला असून पुढील तपास सुरू आहे. या प्रकरणाचा तपास पोलीस निरीक्षक चंद्रशेखर यादव यांच्या मार्गदर्शनाखाली पोलीस उपनिरीक्षक सोमनाथ कचरे आणि त्यांच्या पथकाकडून करण्यात येत आहे.
अवघ्या ३६ तासांत गुन्ह्याचा उलगडा..
वरूडे येथील खुनामुळे परिसरात भीतीचे वातावरण निर्माण झाले होते. कोणताही ठोस पुरावा हाती नसताना शिक्रापूर पोलीस आणि स्थानिक गुन्हे शाखेने तांत्रिक तपास, गुप्त माहिती संकलन आणि बारकाईच्या चौकशीच्या आधारे आरोपीपर्यंत मजल मारली. त्यामुळे अवघ्या ३६ तासांत खुनाचा उलगडा करण्यात पोलिसांना यश आले.
या पथकाची उल्लेखनीय कामगिरी
ही कारवाई पोलीस अधीक्षक संदीपसिंह गिल, अप्पर पोलीस अधीक्षक शुभम कुमार, उपविभागीय पोलीस अधिकारी प्रशांत ढोले यांच्या मार्गदर्शनाखाली ही कामगिरी करण्यात आली. तपास पथकात प्रमोद क्षिरसागर (पोलीस निरीक्षक, स्थानिक गुन्हे शाखा), चंद्रशेखर यादव (पोलीस निरीक्षक, शिक्रापूर पोलीस स्टेशन), महेश डोंगरे (पोलीस उपनिरीक्षक), जितेंद्र पानसरे (सहाय्यक पोलीस निरीक्षक), तसेच स्थानिक गुन्हे शाखेचे जनार्धन शेळके, राजू मोमीन, तुषार पंदारे, संजू जाधव, सागर धुमाळ आणि शिक्रापूर पोलीस स्टेशनचे विकास पाटील, रोहीदास पारखे, शिवाजी चितारे, श्रीमंत होनमाने, अमोल दांडगे, अमोल नलगे, प्रतीक जगताप, नारायण वाळके, राम जाधव व मच्छिंद्र निचीत यांचा समावेश होता. या धक्कादायक खुनाचा अवघ्या ३६ तासांत उलगडा झाल्याने पोलिसांच्या तपास कौशल्याचे परिसरातून कौतुक होत आहे.
