निरा : महान्यूज लाईव्ह
निरा–मोरगाव राज्य मार्गावर शनिवारी (दि. ६ जून) सायंकाळी झालेल्या भीषण अपघातात दोन तरुणींचा जागीच मृत्यू झाला, तर त्यांच्यासोबत असलेला एक लहान मुलगा गंभीर जखमी झाला आहे. या दुर्घटनेमुळे परिसरात हळहळ व्यक्त होत असून काही काळ वाहतूकही विस्कळीत झाली होती.
मिळालेल्या माहितीनुसार, सायंकाळी सुमारे पाच वाजण्याच्या सुमारास गुळुंचे गावापासून सुमारे दोन किलोमीटर अंतरावर, सोमेश्वर देवस्थानाकडे जाणाऱ्या मार्गावर आयशर टेम्पो (क्र. DD-01-G-9343) आणि इलेक्ट्रिक स्कुटी यांच्यात समोरासमोर जोरदार धडक झाली. धडक इतकी भीषण होती की स्कुटीचा अक्षरशः चक्काचूर झाला.
प्रत्यक्षदर्शींनी दिलेल्या माहितीनुसार, धडकेनंतर टेम्पोने स्कुटीला काही अंतर फरपटत नेले. या अपघातात स्कुटीवरील दोन तरुणींना डोके, हात आणि पायांना गंभीर दुखापत झाल्याने त्यांचा जागीच मृत्यू झाला. अपघाताचे दृश्य पाहून उपस्थित ग्रामस्थही हादरून गेले.
अपघातात गंभीर जखमी झालेल्या एका लहान मुलाला ग्रामस्थांनी तातडीने उपचारासाठी रुग्णालयात दाखल केले. त्याच्यावर उपचार सुरू असून त्याची प्रकृती चिंताजनक असल्याचे समजते. दरम्यान, अपघातानंतर आयशर टेम्पो चालक वाहनासह घटनास्थळावरून पळून जाण्याचा प्रयत्न करत होता. मात्र, सतर्क ग्रामस्थांनी त्याचा पाठलाग करून त्याला पकडले आणि पोलिसांच्या ताब्यात दिले.
दरम्यान अद्याप मृत तरुणींची ओळख पटलेली नव्हती. या ठिकाणी गेल्या अनेक वर्षांपासून स्पीड ब्रेकर उभारण्याची ग्रामस्थांची मागणी असून, यापूर्वीही येथे अनेक गंभीर अपघात झाले आहेत. काही जणांना अपंगत्व आले असून अनेकजण जखमी झाले आहेत. त्यामुळे या मार्गावरील सुरक्षिततेचा प्रश्न पुन्हा ऐरणीवर आला आहे. घटनेची माहिती मिळताच पोलिसांनी घटनास्थळी धाव घेऊन पंचनामा केला. पोलीस निरीक्षक नागनाथ पाटील यांच्या मार्गदर्शनाखाली पुढील तपास सुरू आहे.
