पणदरे – स्थळ -निरा डावा कालवा.. बघ्यांची गर्दी झालेली…एक महिला त्या भरून वाहणाऱ्या कालव्यातून वाहत चाललेली…तेथून जात असलेल्या एका युवकाने कोठल्याही क्षणी काहीही होऊ शकते याची कल्पना आल्याने कोणताही विचार न करता थेट कालव्यात उडी घेतली आणि त्या महिलेला वाचवले..विराज जगताप या युवकाच्या रुपाने पणदरे परिसरातील महिलेला आज जणू देवदूतच भेटला..!
आज पणदरे येथे दुपारी ही घटना घडली. दुपारच्या वेळी एक महिला अचानक वाहत चाललेली काही जणांनी पाहिले आणि तेथे बघता बघता बघ्यांची गर्दी जमली. त्याच वेळी तेथून मुलाला शाळेतून नेण्यासाठी विराज जगताप हे चालले होते. त्यांनीही गर्दी कशाची म्हणून थांबून विचारले व माहिती घेतली, तेव्हा त्यांच्या नजरेस हे दृश्य पडले. त्यावेळी अजून काही क्षण थांबलो, तर पुढे अघटीत घडू शकते याचा अंदाज त्यांना आला आणि त्यांनी कशाचाही विचार न करता कालव्यात उडी घेतली आणि सहकाऱ्यांच्या मदतीने संबंधित महिलेला वाचवले. यानंतर तेथे उपस्थित असलेल्या इतरांनी तातडीने या महिलेस दवाखान्यात उपचारासाठी नेले. या घटनेमागील कारण मात्र अद्याप समजू शकलेलेेे नाही.
