भोर : महान्यूज लाईव्ह
शिरवळच्या परिसरात तीन गावांमध्ये दवाखाना असणाऱ्या एका डॉक्टरला 19 वर्षीय युवतीच्या माध्यमातून हनीट्रॅप मध्ये अडकवून तब्बल एक कोटी रुपयांची खंडणी मागितली. यातील टोळीतील दोघांना पोलिसांनी अटक केली असून, मुख्य सूत्रधार अद्याप फरार आहे.
शिरवळ हद्दीत असलेल्या एका डॉक्टरकडे दवाखान्यात काम करणारी 19 वर्षीय युवती काही दिवसांपूर्वी बेपत्ता झाली. त्यावरून डॉक्टरांनी शिरवळ पोलीस ठाण्यात तक्रार दिली होती. काही दिवसांनी डॉक्टरच्या मोबाईलवर एकाने या युवती सोबतचा डॉक्टरचा आक्षेपार्ह व्हिडिओ पाठवला. आणि एक कोटी रुपयाची खंडणी मागितली. या डॉक्टरला युवतीच्या माध्यमातून प्रेमाच्या जाळ्यात ओढून तिच्या मदतीने डॉक्टरला अडचणीत आणणारी योजना आखण्यात आल्याचे यातून दिसून आले.
डॉक्टरांनी हा प्रकार फलटणच्या उपविभागीय अधिकाऱ्याला कळवला. यानंतर फलटणचे उपविभागीय पोलिस अधिकारी राहुल धस यांच्या मार्गदर्शनाखाली पोलीस निरीक्षक यशवंत नलावडे, सहाय्यक निरीक्षक कीर्ती मस्के, फौजदार सपना दांगट, अजित बोराटे, अविनाश भाराळे, सुरज चव्हाण, दीपक पालेपवाड, नीलिमा भिलारे, प्रशांत धुमाळ, स्नेहल शिंगटे यांच्या पथकाने या प्रकरणाचा तपास सुरू केला. तांत्रिक विश्लेषण व गुप्त माहितीदारांच्या माहितीवरून शिरवळ येथे पोलीस पथकाने सापळा रचला.
डॉक्टरकडून खंडणी घेण्यासाठी शिरवळ येथील रामेश्वर गार्डन या ठिकाणची निवड करण्यात आली होती. येथे खंडणी घेण्यासाठी दुचाकीवरून आलेल्या नितीन नवनाथ प्रधान आणि दत्ता अप्पाराव घुगे (दोघेही रा. शिंदेवाडी ता. खंडाळा) या दोघांना दीड लाख रुपयांची रक्कम स्वीकारताना पकडण्यात आले. दरम्यान या दोघांना शुभम जलान नावाचा व्यक्ती सूचना करत होता असे पोलिसांना आढळून आल्याने त्याचाही आरोपी मध्ये समावेश करण्यात आला. दरम्यान हाच मुख्य सूत्रधार असल्याचे सांगितले जात आहे.
