सचिन पवार : महान्यूज लाईव्ह
सरकारी योजना लोकांच्या मदतीसाठी असतात परंतु काही वेळा ती योजना काम करते की नाही याच्यासाठी काहीजण उगीचच तपासून बघतात, तर काहीजण त्रास देण्यासाठी..! जसं की 108, जसं की 112 डायल योजना! अत्यंत अडचणीच्या वेळेस पोलीस उपलब्ध व्हावेत, रुग्णवाहिका उपलब्ध व्हावी यासाठी हे नंबर दिलेले आहेत. पण काही जण कधी कधी त्याचा गैरवापर करतात आणि विनाकारण यंत्रणेची धावपळ करतात. सुपे पोलिसांनी मात्र कारखेलच्या एकाला धडा शिकवला आहे.
कारखेल येथून एक जण सातत्याने पोलिसांना 112 वरून डायल करून मी बायकोला जीवे मारतो आहे अशा प्रकारचा इशारा देत शिवीगाळ करताना ऐकायला मिळायचा. अर्थात 112 यंत्रणेवरून तातडीने त्याची लोकेशन शोधून पोलिसांना माहिती दिली जायची. असे काही वेळा घडले. अखेर सुप्याचे सहाय्यक निरीक्षक मनोजकुमार नवसारे यांनी कारखेलच्या पोलीस पाटलांना आणि पोलिसांना सूचना केली.
त्यावरून सुप्याचे पोलीस कर्मचारी सागर वाघमोडे, कारखेलचे पोलीस पाटील सचिन जगताप आणि होमगार्ड सुरज चांदगुडे यांनी संबंधित व्यक्तीच्या घरी भेट दिली. तेव्हा त्याचे नाव भीमा दशरथ भापकर असे आढळून आले. भीमा भापकर याने हा फोन खोटा केल्याची आढळून आले.
त्याच्या पत्नीकडे चौकशी केल्यानंतर तिने आपला पती हा विनाकारण 112 आणि 108 डायल नंबर वर खोटे फोन करतो. आजपर्यंत मला कधीही मारहाण झालेले नाही अथवा जिवे मारण्याचा प्रयत्न केलेला नाही मात्र तो वारंवार खोटे कॉल करत असतो अशी माहिती दिली.
मग पोलिसांनी भीमा भापकर यांच्याकडे विचारणा केली असता, त्याने देखील काहीच घडले नव्हते. मी खोटा कॉल केला होता असे सांगितले. सातत्याने यंत्रणेचा गैरवापर व यंत्रणेची धावपळ करत असल्याने अखेर पोलिसांनी भारतीय न्याय संहिता २०२३ चे कलम २१२ (a) अन्वये भीमा भापकर याच्यावर गुन्हा दाखल केला.
