राजेंद्र झेंडे, महान्युज लाईव्ह
पाटस येथील विशाल जुन्नर या पतसंस्थेत बनावट सोनेतारण ठेवून पतसंस्थेची तब्बल ७ लाख ८१ हजार रुपयांची फसवणूक केल्याप्रकरणी यवत पोलीस ठाण्यात पाच जणांवर गुन्हा दाखल करण्यात आला. ही माहिती पोलीस निरीक्षक नारायण देशमुख यांनी दिली. प्रकार समोर आला आहे.
परशुराम भुजंग शेळके (रा. बोरीपार्धी, ता. दौंड), अंकुश शिवाजी सुरवसे (रा. बोरीपार्धी, ता. दौंड), गणेश रघुनाथ शेंडगे (रा. केडगाव, ता. दौंड), नीलेश अनिल शहाणे, रोहित उमेश पळसकर (दोघे रा. पाटस ता. दौंड) अशी गुन्हा दाखल झालेल्या व्यक्तींची नावे आहेत.
यवत पोलिसांनी दिलेली सविस्तर माहिती अशी की, पाटस येथील विशाल जुन्नर सहकारी पतसंस्थेत सप्टेंबर २०२२ मध्ये परशुराम शेळके, अंकुश सुरवसे, गणेश शेंडगे यांनी २५८ ग्रॅम ४ मिली वजनाची सोनसाखळी गहाण ठेवली होती. त्या बदल्यात पतपेढीकडून ७ लाख ८१ हजार रुपये कर्ज घेतले होते.
गहाण ठेवलेल्या सोन्याच्या साखळीचे मूल्यांकन पाटस येथील सराफ नीलेश शहाणे व रोहीत पळसकर यांनी केले. त्यांच्याकडून पतपेढीला सोने खरे असल्याचा मूल्यांकन दाखलाही देण्यात आला. तीन वर्षे उलटूनही शेळके, सुरवसे आणि शेंडगे यांनी पतपेढीचे ७ लाख ८१ हजार रुपये कर्ज फेडले नसल्याने सोनसाखळी पतपेढीकडून जप्त करण्यात आली.
जप्त केलेली सोनसाखळी बनावट असून, पतपेढीची फसवणूक झाल्याचे पतसंस्थेच्या अधिकाऱ्यांच्या लक्षात आले. हा प्रकार सप्टेंबर २०२२ ते फेब्रुवारी २०२४ या दरम्यान घडला. या प्रकरणी विशाल जुन्नर सहकारी पतसंस्थेचे अधिकारी अजय लक्ष्मण ढमाळ यांनी यवत पोलिस ठाण्यात फिर्याद दिल्याने पाच जणांवर गुन्हा दाखल करण्यात आला. दरम्यान, हा प्रकार झाल्यानंतर पाटस येथील संबंधित सराफांवर गुन्हा दाखल होऊ नये यासाठी राजकीय दबाव आणुन तडजोडीचे प्रयत्नही करण्यात आल्याची चर्चा परिसरात आहे.
