अहिल्यानगर : महान्यूज लाईव्ह
भाजपाचे नेते पाशा पटेल यांनी भाजपाचे उमेदवार प्रा राम शिंदेंच्या प्रचारार्थ सभेत असभ्य व अश्लील भाषा आणि केलेल्या हातवारेच्या विरोधात कर्जत आणि जामखेड मधील महिलांनी आक्रमकपणे या वक्तव्याचा निषेध करीत त्यांच्यावर गुन्हा दाखल करण्याची मागणी केली. जामखेड पोलीस चौकीसमोर व कर्जत शहराच्या छत्रपती शिवाजी महाराज चौकात पाशा पटेल यांचा पुतळ्यास जोडे मारो आंदोलन करत पुतळा जाळण्यात आला. यावेळी महायुती सरकार, माजी आमदार पाशा पटेल आणि उमेदवार प्रा राम शिंदे यांच्या विरोधात घोषणाबाजी करण्यात आली.
जामखेड येथे भाजपा महायुतीचे उमेदवार प्रा राम शिंदे यांच्या प्रचारार्थ गुरुवारी संध्याकाळी भाजपाचे नेते माजी आमदार पाशा पटेल यांची सभा झाली. भर सभेत महिला-भगिनी समोर उपस्थित असताना पाशा पटेल यांनी अश्लील भाषा वापरली. तसेच सभेत अनेकदा अश्लील हातवारे केले. या कृत्याचा मतदारसंघातील महिलांनी शुक्रवारी दुपारी तीव्र भाषेत निषेध व्यक्त केला.
या प्रसंगी बोलताना राणी कानगुडे म्हणाल्या की, भर सभेत महिला-भगिनी उपस्थित असताना भाजपा उमेदवार राम शिंदेंच्या उपस्थितीमध्ये भाजपाचे नेते पाशा पटेल महिलांच्या बाबतीत अश्लील भाषा वापरत होते. अशा लोकांचा कडेलोट करायला हवा. जे अशी भाषा वापरत आहेत, त्यांना आई-बहीण आहेत की नाही ? असा प्रश्न पडतो. महिलांबद्दल भाजपा नेते कायम वादग्रस्त बोलत आहेत. तरी त्यांचे नेते त्यांना समज देत नाहीत याचे दुर्दैव वाटते.
आगामी निवडणुकीत याच लाडक्या महिला-भगिनी या वाचाळवीरांना त्यांची लायकी दाखवल्याशिवाय गप्प बसणार नाहीत. यावेळी राष्ट्रवादी शरदचंद्र पवार पक्षाच्या महिला आघाडीच्या पुजा सुर्यवंशी, अर्चना राळेभात, राजश्री मोरे, मीनाक्षी साळुंके, उषा राऊत, मनीषा सोनमाळी, प्रतिभा भैलुमे, हर्षदा काळदाते, पूजा मेहेत्रे, छाया शेलार, ज्योती शेळके, लंका खरात, प्रीती जेवरे, माधुरी पाटील, सुवर्णा सुपेकर, स्वाती कानगुडे, सोनाली वाघमोडे, उषा खुरंगे आदी महिला उपस्थित होत्या. या महिला पदाधिकाऱ्यांनी पोलीस ठाण्यामध्ये जाऊन पाशा पटेल यांच्याविरोधात कठोर कारवाई करण्याची मागणी निवेदनाद्वारे केली.
